Azərbaycanla Ukrayna aerokosmik sahədə əməkdaşlıq edəcəklər
Ukrayna və Azərbaycan arasında ticari-iqtisadi münasibətlər dinamik inkişaf edir. 2011-ci ildə əmtəə dövriyyəsi 1,4 mlrd. dollar təşkil edib. 2012-ci ilin yekunları üzrə 2 mlrd. dollar təşkil edəcəyi planlaşdırılır. Bu barədə Ukraynanın Azərbaycandakı səfiri Aleksandr Mişenko bugünkü mətbuat konfransında bildirib.
Ukraynanın baş naziri Nikolay Azarovun aprelin 3-4-də Azərbaycana rəsmi səfəri çərçivəsində gələcək əməkdaşlıq perspektivləri müzakirə olunub.
“Bizim siyasi sahədə heç bir problemimiz yoxdur və bu da iqtisadi əməkdaşlığın və digər sahələrdə əlaqələrin genişləndirilməsi üçün yaxşı şərait yaradır”, - səfir vurğulayıb.
Mayın sonlarında, iyunun əvvəllərində Kiyevdə keçiriləcək hökumətlərarası komissiyanın 10-cu iclasında gələcək əməkdaşlıq perspektivləri müzakirə olunacaq.
Maye qazın nəqlinə dair sazişlər üzərində iş aparılır. Ötən il Azərbaycan Ukrayna NEZ-ə 704 min ton neft nəql edib. SOCAR-ın Ukraynada 25 yanacaq-doldurma məntəqəsi var.
Səfir Azərbaycanın planlarını nəzərə almaqla, aerokosmik sahədə əməkdaşlıq imkanlarını xüsusilə qeyd edib. Əsasən Ukrayna peyklərin buraxılmasında və kosmik texnologiyaların hazırlanmasında öz xidmətlərini təklif etməyə hazırdır. Dnepropetrovsk Dövlət Universitetinin yardımı ilə Azərbaycanda kosmik texnologiyalar və idarəetmə sistemləri üzrə mühəndislərin hazırlanmasına başlanılacaq.
Həmçinin səfir aqrar sahədə əməkdaşlığın inkişafının mümkünlüyünü qeyd edib. Yaxın vaxtlarda aqrar siyasəti naziri Nikolay Prisyajnyuk Azərbaycana səfərə gələcək.
Bundan əlavə, infrastruktur layihələrin - idman qurğularının, aeroportların və s. inşasına dair layihələrin reallaşmasında Ukraynanın “Altkom” şirkətinin imkanları nəzərdən keçirilir.
Mişenkonun fikrincə, turizm sahəsində əməkdaşlığın inkişafı üçün böyük potensial var.
Öz növbəsində Krım Muxtar Respublikasının kurortlar və turizm nazirinin müavini Nikolay Marinov bildirib ki, Krım sanatoriyasında (“3 ulduz”) bir günün qiyməti cəmi 30 avro təşkil edir. Bura qalma, yemək, diaqnostika və beş tibbi prosedur daxildir.
Hazırda Lvov və Simferopol istiqamətlərində “AZAL” aviaşirkətinin reyslərinin artırılması imkanları nəzərdən keçirilir.
