PROQRAMLAR

Azərbaycan Standartlaşdırma İnstitutunun (AZSTAND) nümayəndələri Çin Xalq Respublikasının Çendu şəhərində "Şanxay Əməkdaşlıq Təşkilatına üzv ölkələrdə təmiz enerjinin standartlaşdırılması” mövzusunda təşkil olunan beynəlxalq seminarda iştirak ediblər.

Xeberler.az məlumat verir ki, seminarda Çinin beynəlxalq standartlaşdırma fəaliyyətlərində iştirakı ilə bağlı inkişaf strategiyaları, iş rejimləri, proseslər və tələblər, standartlaşdırma sahəsində qanunvericilik və qaydalar, texniki standartlaşdırma sistemi və beynəlxalq əməkdaşlıqlar barədə məlumat verilib.

Tədbirdə təmiz enerjinin saxlanması texnologiyalarının təsnifatı, xüsusiyyətləri, hazırkı inkişaf vəziyyəti və meyarları, bu sahədə tətbiq olunan standartlar ətrafında fikir mübadiləsi aparılıb. Seminar çərçivəsində iştirakçıların “Shanghai International Port (Group) Co., Ltd. (SIPG)”, “Goodbaby International Holdings Ltd.”, “Tianwei Biotech Group Co., Ltd”, “CATL” kimi qabaqcıl texnologiyalara malik istehsal müəssisələrinin fəaliyyəti ilə yaxından tanış olması məqsədilə bir sıra praktiki səfərlər təşkil olunub. Seminarın praktiki hissəsində iştirakçıları maraqlandıran suallar cavablandırılıb və tədbirin sonunda iştirakçılara sertifikatlar təqdim olunub.

Qeyd edək ki, Şanxay Əməkdaşlıq Təşkilatı (ŞƏT) 2001-ci ildə yaradılıb. Hazırda 9 ölkə - Hindistan, Qazaxıstan, Qırğızıstan, Çin Xalq Respublikası, Pakistan, Rusiya, Tacikistan, İran və Özbəkistan bu təşkilatın üzvüdür. Azərbaycan Respublikası Təşkilatda “Dialoq üzrə tərəfdaş” statusundadır. ŞƏT-in əsas məqsədi mehriban qonşuluq və dostluq münasibətlərinin qurulması, qarşılıqlı etimadın gücləndirilməsi, müxtəlif sahələrdə effektiv əməkdaşlığın təşviqi, regionda sülhün, sabitliyin və təhlükəsizliyin təmin edilməsi üçün birgə səylərin dəstəklənməsidir.