STANDARTLAŞDIRMA, METROLOGİYA VƏ PATENT ÜZRƏ DÖVLƏT KOMİTƏSİ TƏRKİBİNDƏ MƏLUMAT MƏRKƏZİ YARADILIR
Standartlaşdırma, Metrologiya və Patent üzrə Dövlət Komitəsinin mətbuat xidmətindən bildirmişlər ki, Almaniya Texniki Əməkdaşlıq Cəmiyyəti (GTZ) tərəfindən həyata keçirilən “Özəl sektorun inkişafına yardım” layihəsinin standartlaşdırma komponenti üzrə quruma göstərilən texniki yardım istiqamətlərindən biri burada məlumat mərkəzi və bildiriş orqanının yaradılmasıdır. Özündə Azərbaycan Respublikasında qüvvədə olan standartları və digər texniki qanunvericilik bazasını cəmləşdirəcək məlumat mərkəzi, həmçinin yeni qəbul olunan normativ-texniki sənədlər üzrə bildiriş orqanı kimi də fəaliyyət göstərəcəkdir.
Bu sahədə Avropa ölkələrinin təcrübəsinin öyrənilməsi məqsədi ilə Komitənin 5 nəfərlik işçi qrupu Litvada səfərdə olmuşdur. Nümayəndələr Litva Standartlaşdırma Departamentində məlumat mərkəzi və bildiriş orqanının fəaliyyəti ilə yaxından tanış olmuş, bu sahədə qanunvericilik bazası ilə maraqlanmış, standartların idarə olunması sistemi üzrə praktiki biliklər əldə etmiş, texniki komitələrin fəaliyyətini öyrənmişlər. Qeyd edək ki, Azərbaycanla Litva arasında standartlaşdırma, metrologiya və uyğunluğun qiymətləndirilməsi üzrə ikitərəfli saziş layihəsi hazırlanmışdır və bu il imzalanması nəzərdə tutulur.
