EDUTECH

Xeberler.az bildirir ki, Azərbaycan Texniki Universitetinin (AzTU) İnkubasiya Mərkəzi tərəfindən tələbələr və innovasiya ilə maraqlanan gənclər üçün infosessiya təşkil olunub.

Tədbir çərçivəsində AzTU İnkubasiya Mərkəzinin fəaliyyəti, həyata keçirilən layihələr və mərkəzin əsas fəaliyyət istiqamətləri haqqında iştirakçılara geniş məlumat verilib. Infosessiyada startap ekosisteminin inkişafı, tələbələrin innovativ təşəbbüslərinin dəstəklənməsi və universitet daxilində innovasiya mühitinin formalaşdırılması istiqamətində görülən işlər təqdim olunub.

Görüş zamanı AzTU İnkubasiya Mərkəzinin əsas fəaliyyət istiqamətləri – inkubasiya proqramı, “Startap Günləri” təşəbbüsü, hackathonlar, startap yönümlü təlimlər və tələbələrin innovativ layihələrinin inkişafına göstərilən dəstək haqqında məlumat verilib. Tədbirin təşkilində AzTU-nun Tələbə Elmi Cəmiyyəti də fəal iştirak edib.

Eyni zamanda, mərkəzin fəaliyyəti çərçivəsində təşkil olunan təlim proqramları, mentor dəstəyi və startap komandalarının inkişaf mərhələləri barədə iştirakçılarla ətraflı müzakirələr aparılıb.

Tədbirdə həmçinin AzTU İnkubasiya Mərkəzinin təşkil etdiyi müxtəlif innovasiya müsabiqələri, “Startap Günləri” layihəsi və bu çərçivədə formalaşmış startap komandalarının uğurları haqqında məlumat təqdim olunub.

Infosessiya çərçivəsində tələbələrə AzTU İnkubasiya Mərkəzinin yenilənmiş rəsmi saytı da təqdim edilib. Sayt vasitəsilə tələbələr mərkəzin fəaliyyəti, inkubasiya proqramları, keçiriləcək hackathonlar və startap tədbirləri haqqında məlumat əldə edə, eləcə də innovasiya proqramlarına müraciət edə bilərlər.

Bildirilib ki, AzTU İnkubasiya Mərkəzinin əsas məqsədi tələbələrin ideyalarını real layihələrə və startaplara çevirməsinə dəstək göstərmək, texnoloji sahibkarlıq bacarıqlarını inkişaf etdirmək və universitet daxilində innovasiya yönümlü ekosistemin formalaşdırılmasına töhfə verməkdir.

Tədbirin sonunda iştirakçıların sualları cavablandırılıb və tələbələr startap layihələrinin inkişafı üçün mövcud imkanlar barədə əlavə məlumat əldə ediblər.