AZNET

Azərbaycan Texniki Universitetinin (AzTU) rektor əvəzi, professor Xalıq Yahudov Nəqliyyat, Rabitə və Yüksək Texnologiyalar Nazirliyinin və Heydər Əliyev Fondunun “Regional İnkişaf” İctimai Birliyinin birgə təşkilatçılığı ilə keçirilən “İdeyadan biznesə” startap turunun AzTU-dan olan finalçıları ilə görüşüb.

Xeberler.az  bildirir ki, “İdeyadan biznesə” startap turunun respublika üzrə keçirilən final mərhələsində yer alan tələbələri təbrik edən professor Xalıq Yahudov bildirib ki, bu uğur AzTU-da startap hərəkatının genişləndiyindən xəbər verir. Tələbələrin layihələrinin reallaşdırılması üçün universitet tərəfindən hər cür dəstəyin göstəriləcəyini qeyd edən professor Xalıq Yahudov yaxın günlərdə AzTU-da Startap İnkubasiya Mərkəzinin yaradılacağını deyib.

Daha sonra tələbələr layihələri ilə bağlı gələcək planları haqqında rektor əvəzinə ətraflı məlumat veriblər.

Qeyd edək ki, bu ilin aprel ayından etibarən icrasına başlanılan və ölkəmizin 16 ali, 3 ümumtəhsil müəssisəsin iştirak etdiyi “İdeyadan Biznesə” layihəsi çərçivəsində keçirilən startap turlarının respublika finalında ümumlikdə 15 komandadan ikisi AzTU-nun tələbələrindən təşkil olunub. “Just” və “Eagle 2.0” adları ilə yarışan komandalar öz startaplarını 4-7 dekabr 2018-ci il tarixində keçiriləcək 24-cü Azərbaycan Beynəlxalq Telekommunikasiya, İnnovasiya və Yüksək Texnologiyalar Sərgi və Konfransında (Bakutel-2018) nümaiş etdirəcəklər