RƏQƏMSAL DÜNYA

"Bir müddət öncə NRYTN-in Baktelecom ( keçmiş BTRİB) qurumunun 14 milyon manatlıq layihəsi haqqında fikirlərimi bildirmişdim. Tenderdə qalib gələn hansısa DG Telecom şirkəti Bakı ətrafında və bütün Abşeron kəndlərində 14 milyonluq "Evədək optika" layihəsini həyat keçirməlidir. Layihə optik xətt üzərindən GPON texnologiyası əsasında telefon, internet və İPTV xidmətlərinin göstərilməsini nəzərdə tutur. Layihə çərivəsində həmçinin Abşeron yarımadasının bütün kəndlərində LTE texnologiyası əsasında internet və multimedia xidmətlərinin təqdim edilməsi gözlənilir. Baxıram ki, bundan öncə də, bir neçə il ərzində Baktelecom-un bu tip çoxsaylı layihələri olub. Elə ötən il “Nokia” şirkəti ilə də ilkin mərhələdə 400 min avadanlığın alınması ilə bağlı müqavilə imzalamışdı."

Xeberler.az  məlumat verir ki, bu sözləri Azərbaycan İnternet Forumunun prezidenti, İKT sahəsi üzrə ekspert Osman Gündüz deyib. Ekspert  "Görəsən bu istiqamətdə, bu layihələr çərçivəsində görülən işlər hansı vəziyyətdədir?"- kimi sualların hələ də cavabsız qaldığını vurğulayıb :

"Görəsən bu istiqamətdə, bu layihələr çərçivəsində görülən işlər hansı vəziyyətdədir? Hansı işlər görülüb? Nə zaman başa çatacaq? Hansı nəticələr gözlənilir? Zəruri avadanlıqlar vətəndaşlara hansı şərtlərlə veriləcək? Rəqabətli mühit üçün problemlər yaranacaqmı? Həm üstün infrastruktura malik olan, həm də “Evədək optika” kimi nəhəng telekommunikasiya şəbəkəsinə sahib olan dövlət qurumu gələcəkdə özəl sektor üçün, rəqabətli mühit üçün risklər yaradırmı? Hələlik bu layihələrin icrası vəziyyəti, gedişatı və nəticələri haqqında heç bir açıqlama verilməyib. Rəsmi saytlarından da bu haqda hər hansı məlumat almaq indiyədək mümkün olmayıb."