Bakıda avtobus marşrutlarını və körpülərin yerini kompüter təyin edəcək
14-11-2010
03:36
Azərbaycan Nəqliyyat Nazirliyinin Nəqliyyat siyasəti və iqtisadiyyat şöbəsinin müdiri Sədrəddin Məmmədov bildirib ki, bu plan çərçivəsində bütün Abşeron yarımadasının rəqəmsal xəritəsinin hazırlanması nəzərdə tutulur. Bu ilin axırına kimi hazır olacaq xəritə və onun istifadəsində tətbiq olunan yeni proqramlar vasitəsilə Bakı şəhərində nəqliyyatın hərəkətinin tənzimlənməsi və optimallaşdırılması sistemləşmiş şəkildə aparıla biləcək. Məsələn, bu proqram vasitəsilə şəhərdə avtobus marşrutlarının bir-birini təkrarlaması aradan qaldırılacaq, sərnişin sayı və əhalinin sıxlığı nəzərə alınmaqla avtobusların marşrutları korrektə oluna biləcək. Rəqəmsal xəritənin yaradacağı digər imkan paytaxtda yol qovşaqları, ötürücüləri və körpülərin kompüter proqramı vasitəsilə seçilməsidir. S.Məmmədovun sözlərinə görə, kompüter proqramları şəhərdəki sərnişin və nəqliyyat axınlarını izləyərək, bununla bağlı proqnozlar hazırlayacaq: “Məsələn, şəhərdə hansısa yeni obyektin tikintisi planlaşdırılırsa, kompüter proqramları bu tikinti nəticəsində nəqliyyat sistemində baş verə biləcək dəyişiklikləri, nəqliyyat vasitələrinin və sərnişinlərin sayı, axını və s.-i əvvəlcədən hesablayacaq. Nəticədə gələcəkdə hansısa sahədə tıxacın və ya nəqliyyatla bağlı digər gərginliyin yaranacağı əvvəlcədən bilinəcək. Bundan başqa, kompüter proqramları həmin vəziyyətin yaranmaması üçün hansı addımların atılması - həmin ərazidə yollara hansı dəyişikliklərin edilməsinin lazım olduğunu hesablayır”. S.Məmmədov qeyd edib ki, bu proqram vasitəsilə Nəqliyyat Nazirliyinin mütəxəssisləri həmin ərazidə tikilməsi planlaşdırılan yol ötürücüsü və ya körpünün problemi həll edib-etməyəcəyini əvvəlcədən biləcəklər: “Proqramda hazır körpü və ya qovşaq maketləri var. Bu maketlər kompüterdə şərti olaraq həmin əraziyə yerləşdirilir və proqram əvvəlcədən bazasında olan məlumatlar əsasında hesablayır ki, bu körpü problemi həll edə biləcək, ya yox. Əgər cavab mənfi olsa, onda başqa variantlara baxılacaq. Eyni zamanda kompüter proqramı özü vəziyyətdən çıxış üçün ən optimal variantı təklif edə biləcək”.
