E - HÖKUMƏT

Tanınmış hüquqşünas Ələsgər Məmmədli  6 ildən çoxdur müştərisi olduğu Bank Respublika-da problemlə üzləşib.

Belə ki, hüquqşünas ötən günlərdə  Bank Respublika-da  elektron şəkildə şəxsiyyətini təsdiq edən sənədi göstərməsinə baxmayaraq, bank əməkdaşları tərəfindən kobud münasibətlə üzləşdiyini qeyd edib.

Ələsgər Məmmədli virtual kartının istifadə müddətinin artırılması üçün banka getdiyini deyib.

O,  E-gov Portalda öz hesabınıza daxil olub və qeydiyyat üçün ağıllı telefonun ekranında şəxsiyyət vəsiqəsini təqdim etsə də, bank əməkdaşı bunu qəbul etməyərək, hüquqşünas ilə kobud danışıb.

Ondan tələb edilib ki, mütləq şəxsiyyət vəsiqəsinin özü olmalıdır.

Bəs əslində necə olmalıdır, kimdir günahkar?

Məsələ ilə bağlı Azərbaycan İnternet Forumunun prezidenti, ekspert Osman Gündüz Xeberler.az-a bildirib ki, əgər E-gov Portalda öz hesabınıza daxil olub, şəxsi otağınızdan hansısa fərdi informasiya təqdim edirsinizsə, imtina üçün hansısa əsas olmamamlıdır:

“Qanunvericilikdə də birmənalı olaraq qeyd edilib ki “yalnız elektron formada olması” əsas gətirilərək sənədi qəbul etməkdən imtina ola bilməz. Eyni zamanda Portalda hətta elektron arayışların tanınması üçün də imkanlar var”.

Osman Gündüz onu da bildirib ki, banklar öz xidmətlərini elə Elektron Hökumət Portalına inteqrasiya etməlidirlər ki, vətəndaş hesabına daxil olub elə Portaldan bu bank xidmətlərini əldə etsinlər:

“Bildiyim qədər bir-iki bank bu addımı atıb. Eyni zamanda, görəsən onda bu Respublika Bank nə üçün “İnternet şöbə” xidmətini yaradıb ?. Axı burada kart əldə etmək üçün hətta onlayn xidmətlər nəzərdə tutulub”.

Ekspert bildirib ki, burada nəsə anlaşılmazlıq, əməkdaşların təcrübəsizliyi, sadəcə sayğısızlıq və hətta bilərəkdən narazılıq yaratmaq məqamları da ola bilər:

“Ümid edirəm ki, bu bankın məsul şəxsləri və digər aidiyyatı qurumlar bunu araşdıracaqlar. Ölkənin indiki inkişaf səviyyəsində və 10 ildir elektron hökumət quruculuğunun getdiyi bir məqamda bu tip faktlarla rastlaşmaq həqiqətən çox təəssüfləndiricidir”.

Məltəm Talıbzadə