E - HÖKUMƏT

Son zamanlar ölkədə yeni çağırışlar, yeni islahatlar élan edilir. Elektron hökumət, hətta kriptovalyutalar haqqında açıqlamalar verilir.

Bununla yanaşı, ekspertlər də qeyd edir ki, hökumət bəzən elə qərarlar qəbul edir ki, sanki 30-40 il bundan əvvəlki inkişaf mərhələsindəyik.

Azərbaycan İnternet Forumunun prezidenti, ekspert Osman Gündüz hazırda İKT sektorunda yaranan durumu Xeberler.az-a şərh edib.

Onun sözlərinə görə, 19 yanvar 2018-ci ildə Nazirlər Kabineti “Məktəbəqədər təhsil müəssisələrinə qəbul Qaydaları “ haqqında 16 Saylı qərar qəbul edib. Belə ki, Qaydalarda ümumiyyətlə heç “elektron” sözünə rast gəlmək mümkün deyil.

“Qaydaların mahiyyətinə, uşaqların bağçalara qəbul prosesinə , qəbuldan imtina məslələrinin tənzimlənməsinə baxanda elə düşünmək olar ki bu sənəd nəinki elektron hökumət quruculuğunun xeyli inkişaf etdiyi ölkəmizdə, sanki ümumiyyətlə elektron hökumət quruculuğundan heç anlayışı olmayan bir ölkədə hazırlanıb. Qaydalarda ümumiyyətlə heç “elektron” sözünə rast gəlmək mümkün deyil. Halbuki, Açıq Hökumətin təşviqinə dair 2016-2018-ci illər üçün Milli Fəaliyyət Planında məhz məktəbəqədər müəssisələrə uşaqların qəbulu ilə bağlı elektron xidmət yaratmaq nəzərdə tutulub (Bənd 1.6). Bu sənədi Prezident təsdiq edib və konkret vaxt müəyyən edib. İcraçılar da yerli icra hakimiyyətləri və Nəqliyyat, Rabitə və Yüksək Texnologiyalar Nazirliyidir (NRYTN) . Amma göründüyü kimi bu bənd nəinki icra edilməyib, ümumiyyətlə icrası heç nəzərdə tutulmayıb”.

Korrupsiya üçün münbit şərait yaradan hüquqi sənədlərin qəbuluna görəsən necə və kimlər imkan yaradır?

“Ən azı bizə qonşu olan ölkələrin oxşar sənədlərinə baxanda görmək olar ki , bağçalara uşaq qəbulu üçün müraciət elektron formada, uşaqların bağçaya qəbul növbəsi elektron formada, bağçada yerlərin boşalması və növbəsi çatan valideynlərə mesajlar elektron formada, bir sözlə bütün proses həm oflayn həm də elektron formada qurulub. Bizdə qəbul olunan Qaydalarda isə bunun heç bir əsər - əlaməti yoxdur. Sadəcə beş-altı cümlə əlavə ediblər”.

Ekspert onu da deyib ki, bağçalar Təhsil Nazirliyinin deyil, yerli icra hakimiyyətlərinin nəzarətindədir.

O hesab edir ki, Qaydaların hazırlanmasına da elə yerli icra hakimiyyətinin nümayəndələrini dəvət ediblər:

“Ümid edirəm ki qanunvericiliyin ekspertizası ilə məşğul olan müvafiq qurumlar, Korrupsiyaya qarşı mübarizə üzrə Komissiya, VXSİ Dövlət Agentliyi öz səlahiyyətləri çərçivəsində bu məsələni araşdıracaq və qəbul edilən Qaydaların yenidən işlənməsi üçün təşəbbüs göstərəcək”.

Ekspert təklif edib ki, hazırda ölkədə idarəetmə sahəsində həyata keçirilən indiki islahatlar çərçivəsində məktəbəqədər müəssisələrinin TN balansına keçirilməsi doğru addım olardı.

Məltəm Talıbzadə