Rəqəmsal hökumət quruculuğunun sürətləndirilməsi üçün mühüm addım atılıb. Beləki, Bütün dövlət qurumlarına vətəndaşlardan hansısa sənədlər tələb etmək qadağan edilib.
Ötən ilin sonu eyni anda xeyli sayda qanunlara oxşar bir dəyişiklik edilib. Bu dəyişikliklər də artıq Prezident tərəfindən təsdiqlənib.
"Dəyişiklik çox mühüm əhəmiyyət kəsb edir. Hətta deyərdim ki, birdən birə çoxsaylı qanunlara bu tip dəyişikliyin edilməsi, ölkədə rəqəmsal hökumət quruculuğunun sürətləndirilməsi baxımından inqilabi bir addımdır".
Bunu Xeberler.az-a məsələni şərh edərkən Azərbaycan İnternet Forumunun prezidenti, ekspert Osman Gündüz deyib.
Dəyişikliyin mahiyyətindən danışarkən ekspert bildirib ki, əgər vətəndaş hansısa dövlət xidmətini alarkən müəyyən sənədlərə ehtiyac yaranırsa dövlət qurumu ilk növbədə bunları vətəndaşdan deyil, Elektron Hökumət İnformasiya Sistemindən əldə etməlidir. Yəni, bu o demək ki, əgər hansısa bir dövlət qurumunda vətəndaşla bağlı informasiya varsa digər dövlət qurumu bu informasiyanı vətəndaşdan deyil, elə həmin dövlət qurumundan istəməlidir.
Yox, əgər bu mümkün deyilsə, yəni bu qurumun Elektron Hökumət Sisteminə inteqarsiyası yoxsa, sistem donubsa, çökübsə və ya hansısa problem varsa onda xidməti göstərən dövlət qurumu bu sənədələri vətəndaşın razılığı ilə digər dövlət qurumlarından özü sorğulamalıdır.
Əgər vətəndaş əldə etmək istədiyi xidmətlə bağlı zəruri sənədləri özü dövlət qurumuna təqdim etmək istəyirsə qanun buna da imkan verir.
