TƏNZİMLƏMƏ

Məlumat verdiyimiz kimi, bu gün səhər saatlarından Aztelekom MMC tabeçiliyində fəaliyyət göstərən Beynəlxalq Avtomat Telefon Stansiyasının (BATS) xidmətlərində problemlər yaranıb.

“Bu gün günorta saatlarında Aztelekom MMC Beynəlxalq Stansiyasında  yaranmış texniki nasazlıq mütəxəssislər tərəfindən aradan qaldırılıb. Belə ki, kanallarda yaranmış problem bu saatlarda abunəçilər tərəfindən zəng etmə cəhdlərinin çox olması xətlərin yüklənməsinə səbəb olub”.

Xeberler.az-ın məlumatına görə, bu barədə Rabitə və və Yüksək  Texnologiyalar Nazirliyinin bu gün BATS-da yaranan problemlə bağlı yaydığı açıqlamasında bildirilib.

Qeyd edilib ki, bu cür problemlərin gələcəkdə baş verməməsi üçün hazırda IP əsaslı multimedia platforması üzərində iki müasir beynəlxalq stansiya qurulur:

“Ən son texniki imkanlara malik olan stansiyalar paralel işləməklə yanaşı, hər hansı problem yarandığı təqdirdə  həmin stansiyalardan biri digərinin trafik yükünü tam şəkildə ödəyə biləcək.Mövcud olan hazırki stansiya isə üçüncü stansiya kimi fəaliyyətini davam etdirəcək”.

Bu gün səhər saat 12:00-dan xaric ilə telefon danışığı həyata keçirmək mümkün olmayıb.

Həmçinin bəzi hallarda danışıqların digər bir beynəlxalq rabitə xidməti göstərən Azərtelekom şirkəti üzərindən yönləndirildiyi bildirilib.

Məlum olduğu kimi,  indiyədək beynəlxalq danışıqları  yalnız  RYTN tabeliyində olan Aztelekomun-un Beynəlxalq Avtomat Telefon Stansiyası (BATS) üzərindən həyata keçirmək mümkün idi. Bütün mobil operatorlar da məhz bu qurumun üzərindən beynəlxalq bağlantılar  qura  bilirdi.

Artıq bir müddətdir ki, Azərtelekom şirkətinin də bu cür beynəlxalq rabitə xidməti göstərdiyi bildirilir.

 Məltəm Talıbzadə