İNTERNET

Əhalinin böyük hissəsinə internet xidməti göstərən “Baktelekom” şirkətinin saytında xidmət ödənişlərinin elektron qaydada keçirilməsinin mümkün olduğu qeyd olunub. Ödəmə sistemləri olaraq isə Elektron Hökumət Portalı, SmartPay, Hesab.az, Kassam.az və GoldenPay göstərilir.

Lakin Xeberler.az redaksiyasına daxil olan çoxsaylı şikayətlərdən məlum olub ki, bir müddətdir bu ödəniş sistemlərində problem yaranıb. Belə ki, istifadəçilər heç bir ödəniş sistemindən online şəkildə ödəniş edə bilmədiklərini və bu problemin uzun müddətdir davam etdiyini bildiriblər.

Məsələ ilə bağlı istifadəçilər Baktelekomla əlaqə saxlasalar da onlara problemin olduğu, lakin bu problemin Baktelekomdan deyil, ödəniş sistemlərindən qaynaqlandığı bildirilib. Səbəb kimi isə ödəniş sistemlərinin həddindən artıq yüklənməsi göstərilib.

Lakin araşdırmalar göstərir ki, problem daha çox Baktelekom şirkəti ilə əlaqədardır.

Yalnız bir ödəniş şirkətində deyil, bütün ödəniş sistemlərində Baktelekom şirkətinin ödənişlərində problemlər görünür.

Görəsən Baktelekom-da nə baş verir?

Ekspertlər bu problemin Aztelekom və Baktelekomun birləşməsindən dolayı yarana biləcəyini qeyd edirlər.

Uzun müddətdir Baktelekom və və Aztelekomun birləşdirilməsi prosesi gedir. Son zamanlarda bu birləşmənin başa çatmaqda olduğu bildirilirdi.

Görünən odur ki, bu birləşmə prosesinin getməsinə baxmayaraq, Baktelekom ödəniş sistemlərinin inteqrasiyasını başa çatdıra bilməyib. Yəni indiyədək Baktelekom və Aztelekom şirkətinin ödəniş sistemləri fərqli olub. 

Problemin əsas mahiyyətinin də elə bu birləşmədən qaynaqlandığı bildirilir. 

Mövzuya qayıdacağıq.