İKT TƏHSİL

Məlum olduğu kimi, bir müddət öncə 2017/2018-ci tədris ili üçün ali təhsil müəssisələrinin bakalavriat səviyyəsinə keçirilən müsabiqədə ixtiasalar üzrə seçimlər aparıldı.

Belə ki, müşahidələrimiz göstərir ki, bu il  “Kompüter elmləri”, “Kompüter mühəndisliyi”, “İnformasiya texnologiyaları”, “Sistem mühəndisliyi” kimi texnoloji ixtisaslara böyük  maraq olub.

Xeberler.az olaraq bu məsələni daim diqqətdə saxlayırıq.  Hətta, bu yaxınlarda 695 bal ilə ADA Universitetinin  İT ixtisasını seçən xanım tələbəmiz ilə müsahibəmiz də yayımlandı.

Görəsən, ümumiyyətlə, bu il İT ixtisaslara neçə nəfər qəbul olub?

Dövlət İmtahan Mərkəzindən  DİM) saytımıza verilən statistikaya əsasən bu barədə ətraflı məlumat təqdim edirik:

Qeyd edilib ki, bu il “Kompüter elmləri” ixtisasına 511 plan yeri olub. Bu ixtisasa 2 min 534 nəfər ərizə verib, onlardan 463 nəfəri  qəbul olub.  Qəbul edilən abituriyentlərin orta balı isə 488.957 olub.

“Kompüter mühəndisliyi” ixtisasında plan yer isə 640 olub. 4 min 428 nəfər bu ixtisası seçsə də, onlardan yalnız 522 nəfəri qəbul ola bilib.  Bu ixtisasa qəbul olunanların orta balı isə 382.728  olub.

“İnformasiya texnologiyaları”  üçün 568 yer ayrılıb.  3 min 882 nəfər İT ixtisasına müraciət edib, onlardan 486 nəfər qəbul edilib. İT-yə isə orta bal 427.488 ilə qəbul olub.

Bu il “Sistem mühəndisliyi”nə cəmi 192 yer ayrılıb. Bu ixtisasa qəbul olmaq üçün 2 min 766 ərizə olub. Onlardan yalnız 181 nəfər qəbul ola bilib. Bu ixtisasa qəbul edilənlərin orta balı 405.011 olub. 

Məltəm Talıbzadə