"Son bir neçə ildə Ədliyyə Nazirliyi tərəfindən ədliyyə və məhkəmə sisteminin rəqəmsal transformasiyası sahəsində bir sıra uğurlu addımlar atılıb. "Elektron Məhkəmə" sistemi və onun digər qurumlara inteqrasiyası, "Elektron icra" sistemi, İcra hakimiyyətlərinə, banklara və konsulluqlara inteqrasiya olunan "Elektron notariat" sistemi və "Mobil notariat" tətbiqi, "Hüquqi aktların vahid elektron bazası” nın yenilənmiş versiyası, bələdiyyə sistemi və s. resurslar hazırda bu sahədə aktiv formada istifadə olunur".
Xeberler.az bildirir ki, bu sözləri Azərbaycan İnternet Formunun Prezidenti Osman Gündüz deyib.
Osman Gündüzün sözlərinə görə, Mobil notariat" resursu hazırda ölkədə və ölkə xaricində olan vətəndaşlar tərəfindən istifadə olunan ən populyar rəqəmsal həlldir.
"Ötən gün Ədliyyə Nazirliyi və Milli Məclisin Hüquq siyasəti və dövlət quruculuğu komitəsi tərəfindən təşkil olunan ədliyyə və məhkəmə sistemində islahatlar və innovasiyaların tətbiqi ilə bağlı ictimai təqdimatda da bu istiqamətdə müzakirələr aparılıb.
Tədbir yeni istifadəyə verilən, ən müasir innovasiyaların istifadə edildiyi Sumqayıt Məhkəmə Kompleksində baş tutub.
İctimai təqdimatda Ədliyyə Nazirliyinin, Milli Məclisin komitə sədlərinin, deputatların və vətəndaş cəmiyyəti nümayəndələrinin iştirakı ilə müzakirələr olub.
Çıxışlarda hakimlərin müstəqilliyinin və nüfuzunun möhkəmləndirilməsi, məhkəmələrə ictimai etimadın artırılması, məhkəmə qərarlarının ədalətliliyinin və icrasının təmin edilməsi, rəqəmsal transformasiyanın inkişaf etdirilməsi, tətbiq olunan rəqəmsal sistemlərdən vətəndaşların daha geniş bəhrələnməsi və digər məsələlərlə bağlı təkliflər verilib.
Nöbbəti mərhələdə islahatların və rəqəmsallaşmanın davam etdiriləcəyi, yeni resursların və mobil həllərin hazırlanmasına daha çox diqqət yetiriləcəyi, Ədliyyə Nazirliyinin digər ictimai əhəmiyyət kəsb edən xidmətlərinin də rəqəmsal resurslara inteqrasiya ediləcəyi bildirilib".
