Ötən həftə Rəqəmsal İnkişaf və Nəqliyyat Nazirliyi yanında İctimai Şuranın Azərbaycan Dəmir Yolları QSC (ADY) rəhbərliyi ilə görüşü keçirilib.
Xeberler.az bildirir ki, görüşdə əsasən aşağıdakı məsələlər müzakirə mövzusu olub:
- ADY-də son illərdə aparılan islahatlar, modernləşmə və gözləntilər
- ADY-də rəqəmsal transformasiya
- Dəmiryolu ilə sərnişindaşımada qiymətlər və xidmət səviyyəsi
- ADY-nin təhlükəsizlik siyasəti və s.
Məsələyə Azərbaycan İnternet Formunun Prezidenti, ekspert Osman Gündüz münasibət bildirib.
Ekspertin sözlərinə görə, onun qaldırdığı məsələlər əsasən Dəmiryolu ilə sərnişindaşımada qiymətlər və xidmət səviyyəsi, ADY-nin təbii inhisar subyekti olması baxımından hesabatlılığı və gözləntilər, rəqəmsal transformasiya və s. olub:
"ADY son bir neçə ildə əsasən yükdaşımada, eyni zamanda sərnişindaşımada, xüsusilə də infrastrukturun modernləşməsi və transformasiyada xeyli işlər görüb.
Güman ki, bu baxımdan görüşdə, gözlənildiyi kimi də ən çox müzakirə olunan və qarşılıqlı arqumentlərin səsləndirildiyi mövzu dəmiryolu ilə sərnişindaşımadakı qiymətlər mövzusu oldu.
Son zamanlar bu mövzu ictimai əhəmiyyət kəsb edir və cəmiyyətdə ciddi müzakirə predmetidir.
Xatırladıram ki, hazırda ölkədaxili istiqamətlərdə standart (plaskart), standart+(kupe), biznes (SV) və Birinci klass üzrə sərnişindaşıma qiymətləri əvvəlki qiymətlərə nisbətən 3-4 dəfə bahalaşıb.
Qeyd etdiyim kimi bu məsələ ətrafında xeyli müzakirə getdi. Xüsusən də Bakı-Balakən qatarında doluluq səviyyəsinin aşağı olmasının məhz qiymətlərin yüksək olması ilə bağlı olduğu diqqətə çatdırıldı".
Osman Gündüz bildirib ki, onun fikrincə ADY bu istiqamətdə cəmiyyətdə gedən müzakirələrdən xəbərdardır. Və hələlik qiymətləri də endirmək istəmir:
"Məsələn, yerli vətəndaşlar üçün məcburi verilən yemək setinin ləğv edilməsi yolu ilə qiymətlərin endirilməsi təklifi də ADY rəhbərliyini heç cürə qane etmədi. ADY bilet alarkən yemək seçimini yerli vətəndaşların ixtiyarına buraxmaq istəmir.
Yerli vətəndaşlar da baxmayaraq ki, məcburi verilən yemək setinə də ödəniş ediblər, ondansa evdə daha keyfiyyətli səhər yeməyinə üstünlük verirlər.
İstənilən halda, düşünürəm ki, standart (plaskart), standart+(kupe), biznes (SV) üçün qiymətlər çox yüksəkdir və ümid edirəm ki ADY bunlara yenidən nəzər salacaq".
Ekspertin sözlərinə görə, görüşdə o da məlum oldu ki, ADY rəsmiləri artıq dəmiryolu ilə sərnişindaşımanı ictimai nəqliyyat növü olaraq qəbul etmirlər. Onlar bunun qanunvericilikdə nəzərdə tutulduğunu qeyd edirlər. Fikrimcə bu məsələnin ayrıca müzakirəsinə ehtiyac var:
"Əlbəttə, elə məsələlər oldu ki, bu görüşdə həllini tapmadı və hərə öz fikrində qaldı.
ADY-nin son bir neçə ildə atdığı addımlar, zaman-zaman bu tip görüşlər keçirməsi, hesabatlar təqdim etməsi, ictimai əhəmiyyət kəsb edən məsələlər ətrafında müzakirədən yayınmaması yetərincə təqdirəlayiqdir".
