Ötən həftə ADY-nin özünü tərifləməsi, vacib problemlərə diqqət yetirməməsi ilə bağlı yazmışdıq və media da bunu xeyli yaymışdı.
Baxıram ki, bu gün Azərbaycan Dəmir Yolları QSC-nin rəsmisi mövzu ilə bağlı APA Ekonomiks-ə açıqlama verib. Bunun özü təqdirəlayiq bir addımdır ki, qurum cəmiyyəti narahat edən problemə dərhal reaksiya verib, problemə aydınlıq gətirməyi vacib hesab edib.
Amma, qeyd olunan açıqlamada mövcud problemə, yəni, Bakı-Astara, Bakı-Balakən, Bakı -Böyük Kəsik , Bakı- Yalama qatarlarının nə zaman işə düşəcəyi məsələsinə aydınlıq gətirilməyib. Nə qədər qəribə səslənsə də , ADY rəsmisi bildirib ki, bu dəmiryol xətlərində əsaslı təmir-bərpa üzrə iqtisadi layihələndirmə işləri aparıla bilər.
Xatırlayıram ki, uzun illər ADY -nin köhnə rəhbərliyi bu problemin həlli ilə bağlı "sabit cərəyanın dəyişən cərəyana keçirilməsi" nağıllarını səsləndirirdilər.
ADY-nin yeni rəhbərliyindən gözləntilər çoxdur. Bir sıra faydalı addımları da diqqət cəlbedən olub.
Amma xeyli müddət keçməsinə baxmayaraq yeni rəhbərliyin ciddi bir problemin həllinə ağlabatan bir cavab verməməsi çox təəssüf doğurur. Bildirmək istərdim ki, problemin həlli ilə bağlı Prezidentin məlum fərmanı var. ADY rəhbərliyi çalışıb, vuruşub bu fərmanın icrasına nail olmalı, hökumətdən subsidiya almalı və atılmış vəziyyətdə olan yolların, stansiyaların təmirinə başlamalıydı.
Açıqlamalar bu istiqamətdə olmalıdır ki, hökumət Prezidentin fərmanının icrasına necə yanaşır, bu işə investisiya yatırılacaqmı, dəmir yollarının bərpası ilə bağlı aydın bir Yol Xəritəsi varmı Düzü, çox təəccübləndim yeni rəhbərliyin açıqlamalarına. Demək rəhbərlikdə hələ də bu problemin ağlabatan bir həlli ilə bağlı planlar yoxmuş.
Ümid edirəm fərqindədirlər ki, qeyd olunan yazıda ADY rəsmisinin sadaladıqları görülən işlərin xeyli hissəsinin bünövrəsi yeni rəhbərlikdən öncə qoyulub .
Odur ki, düşünürəm ADY rəhbərliyi daxili sərnişindaşımanı pandemiyadan əvvəlki səviyyəyə qaldırmaq üçün, dağılmış vəziyyətdə olan həmin istiqamətlər üzrə infrastrukturun bərpası və yeni qatarların bu xətlər üzrə işə salınması üçün səylərini gücləndirməlidirlər.
Osman Gündüz,
Azərbaycan İnternet Forumunun prezidenti
