"5 il dayandırılan, infrastrukturu yararsız olan bir dəmir yol marşrutunun yenidən bərpası və uzaq regionlara alternativ sərnişindaşımanın təşkli regionun inkişafı baxımından mühüm əhəmiyyət kəsb edir. Bu, gələcəkdə Bakı-Balakən-Tbilisi dəmir yol xəttinin çəkilişi üçün də zəmin yaradır".
Xeberler.az məlumat verir ki, bu fikirləri Azərbaycan İnternet Formunun Prezidenti, ekspert Osman Gündüz şəxsi sosial media hesabında paylaşıb.
Osman Gündüz qeyd edib ki, ADY qatara minməyə qədər olan məsafəni tam rəqəmsallaşdırıb:
"Biletlərin axtarışı və alışını onlayn olaraq sayt və mobil tətbiq üzərindən reallaşdırmaq olar, biletin yoxlanışı da tam rəqəmsallaşıb. Kağız sənəd göstərməyə ehtiyac yoxdur, myGov-dakı şəxsi məlumatlar yetərlidir. Qatar, vaqon və kupelər tam modernləşdirilib".
Ekspert bildirib ki, elektrik, İnternet, işıqlandırma və istilik də qaydasındadır:
"Wi-Fi ilə verilən internetin keyfiyyəti dəmir yolu boyunca mövcud olan mobil şəbəkədən asılıdır. Çünki internet vaqonlardakı xüsusi mobil modemlər vasitəsilə qəbul edilərək paylanır və əlbəttə ki burada müəyyən problemlər ola bilir".
Osman Gündüz qeyd edib ki, hər üç vaqon tipi üçün təklif olunan qiymətlər çox yüksəkdir. Biznes sinif qiymətlər isə əvvəlki mövcud SV-dən 4 dəfə bahadır:
"Anlaşılnadır ki, sərnişindaşıma rentabelli deyil və bu cür tariflər mövcud infrastrukturu və xidmət səviyyəsini qoruyub saxlamaq üçün tətbiq edilib.
İstənilən halda ümid edirəm ki, ADY bu məsələyə yenidən baxacaq. Xüsusən də, tələbələr, pensiyaçılar və çoxuşaqlı ailələr üçün buna ciddi ehtiyac var. Müntəzəm səyahət edənlər üçün isə xüsusi endirimli biletlər təklif edilə bilər".
