21–22 may tarixlərində GSMA-nın təşkilatçılığı ilə Daşkənddə keçirilən “
M360 Eurasia 2025” forumu telekommunikasiya və texnologiya üzrə sənaye liderlərini bir araya gətirib.
Tədbirdə “Azercell Telekom” MMC-nin prezidenti Zərinə Zeynalova Özbəkistanın Rəqəmsal Texnologiyalar naziri Şerzod Şermatov, GSMA-nın baş direktoru Vivek Badrinath və Beynəlxalq Telekommunikasiya İttifaqı (ITU) baş katibinin müavini Tomas Lamanauskas kimi yüksək vəzifəli şəxslərlə yanaşı forumun açılış sessiyasında çıxış edib.
Xeberler.az bildirir ki, keçirilən Forumu Azərbaycan İnternet Formunun Prezidenti, ekspert Osman Gündüz şərh edib.
Ekspertin sözlərinə görə, gündəliyinə, çıxışlara, təqdimatlara göz gəzdirəndə, Azercell-in bununla bağlı rəsmi olaraq yaydığı açıqlamalara baxanda təəssüflənməmək mümkün deyil:
"Bizim ən öndə gedən mobil operatorumuz, nəhəng dövlət şirkəti olan Azercell regionda innovasiyalar və texnologiyar sahəsində öz mövqelərini itirməkdədir. Son bir neçə bu geriləmə bu tip konfranslarda açıq şəkildə görsənir.
Zarina xanımla yanaşı zalda əyləşən qonşu ölkələrin mobil operatorların rəhbərləri 5G və 6G -dən, 5G və süni intellektin inteqrasiyasından, daha innovasiyalı addımlardan danışdıqları halda Azercell rəhbəri Aztelekom-un GPON layihəsindən danışıb".
Osman Gündüz bildirib ki, əslində başqa gözlənti də yoxdur:
"Uzun müddətdir ki hansısa səbəblərdən bizim mobil operatorlar 5G şəbəkəsinin qurulmasına start verə bilmirlər. Heç lisenziyaları da yoxdur.
Distant təhsil xidməti vermək istəyən universitetləri zorla arxadan tutub saxladıqları kimi, kimlərsə bizim mobil operatorlara da 5G-ni qadağan edib.
Regionda 5G şəbəkəsi genişlənir, 6G müzakirə olunur, bizim mobil operatorların başı qarışıb mövcud tarifləri qaldırmağa, bəsit xidmətlərə. Ən bahalı mobil internet və mobil danışıqlar isə bizdədir.
Amma tariflərin qaldırılmasından əldə olunan vəsaitlərin yeni texnologiyalara investisiya yatırımını, keyfiyyət və xidmət çeşidlərinin artımını da biz müşahidə etmirik.
Tezlikləri, lisenziyanı mobil operatorlara verməli olan İKTA -nın da başı qarışıb provayderlərlə internet sürəti qaldırmaq kimi bəsit müzakirələrə".
Sonda ekspert qeyd edib ki, Qlobal şirkətlərlə işbirliyi quran qonşu ölkələr, Gürcüstan (Nokia), Ermənistan (Nokia), Qazaxıstan( Nokia, Huawei), Özbəkistan (Nokia), Tacikistan (Huawei) innovasiyalarda, süni intellekdə, hətta 5G və süni intellektin inteqrasiyası sahəsində irəliləyirlər.
