"Bir müddət olardı qonşu ölkələrin mobil bazardakı inkişafına nəzər salmamışdım. O qədər sürətlə irəliləyirlər ki, tez-tez baxanda da faydalı iş əmsalımız aşağı düşür".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib:
"Ötən günlər 5G ilə bağlı ölkəmizdə yeni xəbərlər olacağı məlumatını alanda regional mobil bazara bir də göz gəzdirdim. Və çox təəccübləndim, qısa zamanda xeyli irəliləyiblər.
Bizim mobil operatorların isə innovasiyalara və texnologiyalara deyil, "1 manat- 1 gün" prinsipi ilə müştərilərlə davaya başları qarışıb.
Baxıram ki, qonşu ölkələrdə əsas biznes və sənaye mərkəzlərində 5G şəbəkələri artıq tamamlanmaq üzrədir, 6G və süni intellekt inteqrasiyasını müzakirə edirlər.
Ölkəmizdə mobil operatorlara tezlik ayırmalı olan, tezliklərin müsabiqəsini keçirməli olan İKTA-nın da başı qarışıb bəsit yazı müsabiqələrinin təşkilinə. Requlyator yazı müsabiqəsi keçirir, qonşu ölkələrin də 5G-si gəlib çatıb bizim sərhədə. Bu sahədə çox ləngidik".
Ekspert qeyd edib ki, bəzən bu sahənin inkişafına cavabdehlər bildirir ki, mobil operatorlar bu sahəyə investisiya yatırmaq istəmir, bizdə buna tələbat yoxdur, gərək güclü inkişaf olsun ki, tələbat artsın və bizim müftəxor mobil operatorlar da şəbəkəni qursun.
Belə olan halda sual yaranır ki, bəs qonşu ölkələrdə tələbat necə yaranıb ki, bu sahəyə investisiya yatırıblar?
"Anlaşılmaz bir vəziyyət yaranıb. Hər gün tarifləri qaldırıb xımır-xımır həzm edən mobil operatorlar yeni texnologiyalara və innovasiyalara investisiya yatırmağı istəmirlər, tənzimləyici də buna təsir edə bilmir.
Düşünürəm ki, RİNN bu sahədə səylərini çox gücləndirməlidir. Ümid edirəm regionda 5G sahəsində formalaşan vəziyyətə baxdıqdan sonra hökumətimiz də bu sahədə hansı vəziyyətdə olmağımızın fərqində olacaq".
