"Son zamanlarda hiss olunur ki, mobil operatorlar xidmətlərin qiymətlərini artırmaqda çox maraqlıdır. Həm də bu proses az zaman fərqi ilə operatorların hamısında baş verir, sanki hər üç mobil operator bunu separat sövdələşmə ilə edirlər".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, bütün bunların kökündə mobil bazarda rəqabətin zəif olması dayanır.
"Hər üç operatorun, Azercell, Bakcell və Nar mobil operatorlarının fəaliyyət göstərdiyi mobil bazarda sanki balanslaşdırılmış bir rəqabət var, sanki razılaşdırılmış bir tarif siyasəti var.
Maraqlıdır ki, Azercell dövlət şirkətinə çevriləndən sonra mobil bazarda rəqabət daha da azalıb. Mobil bazarda texnoloji bir durğunluq, innnovasiyaların çatışmazlığı da özünü açıq-aşkar göstərir".
Osman Gündüz bildirib ki, istifadəçilər 4G-nin üstünlüklərini görə bilmədiyi halda, qonşu ölkələrdə 5G infrastrukturu qurulub və üzərində "ağıllı şəhərlər" salırlar. Onlarda müzakirə predmeti artıq 6G üzərindədir.
"Bizim mobil operatorlarımız siə sanki "yatıblar", bahalı trafiki, bahalı datanı satmaqla işlərini bitmiş hesab edirlər.
Düşünürəm ki, belə bir vəziyyət Antiinhisar Dövlət Xidmətini və operatorlara bütün ölkə boyu fəaliyyət üçün lisenziya verən Rəqəmsal İnkişaf və Nəqliyyat Nazirliyini ciddi narahat etməlidir. Hər iki qurum monitorinqlər aparmalı, araşdırmalıdırlar ki, rəqabətin qarşısnı alan amillər hansılardır".
Ekspert bildirib ki, bu baxımdan RİNN yanında yeni yaradılan İKT Agentliyindən gözləntilər çoxdur, təəssüf ki, bu dövlət qurumunun formalaşdırılması, rəhbərinin təyin edilməsi prosesi də xeyli müddətdir ki uzanır və sektorda normal tənzimləmə prosesinin oturuşmasına mənfi təsir göstərir.
Osman Gündüz mobil internetin qiyməti məsələsinə də toxunub. Onun fikrincə qonşu ölkələrlə müqayisə etdikdə ölkədə mobil internetin qiyməti kifayət qədər yüksəkdir.
"Statistikaya baxanda görmək olur ki, qonşu ölkələrdə mobil tariflər həm də azalmağa doğru geydiyi halda bizim operatorlar ən yaxşı halda uzun müddət qiyməti stabil saxlamaqda, bir çox hallarda isə qiyməti qaldırmaqda maraqlıdırlar.
İkinci diqqət çəkən məsələ isə rayon mərkəzlərindən uzaq olan ərazilərdə, əhali sayı az olan kəndlərdə, avtomobil magistralları və dəmiryol xətti boyunca mobil infrastrukturun qurulmamasıdır.
Çox sayda kəndlərimizdə ümumiyyətlə mobil internet yoxdur, mobil rabitə isə keyfiyyətsizdir.
Məlumdur ki, hazırda RİNN bütün ölkə üzrə internet infrastrukturun qurulması istiqamətində işlərə başlayıb. Rayonlarda rabitə briqadaları işləyir. Bildirib ki, 2 il ərzində bu proses başa çatmalıdır.
Belə bir məqamda mobil operatorların da bu işlərə töhfə verməsi, ən azı əhali sayı az olan ucqar kəndlərdə baza stansiyaların qurulmasına diqqət yetirməsi doğru olardı".
Ekspertin sözlərinə görə, mobil operatorlar lisenziya şərtlərində bütün ölkə boyu keyfiyyətli rabitə xidmətləri verməyi öhdəsinə götürsə də, real vəziyyət ondan ibarətdir ki belə bir xidmət bütün ölkə boyu yoxdur.
"Əgər mobil operatorlar bütün ölkə boyu keyfiyyətli və dayanıqlı infrastruktur qurmaqdan yayınırlarsa, onda fikrimcə adı çəkilən müvafiq dövlət qurumları zəruri addımlar atmalıdır.
Əlbəttə, bizim rəqəmsal bazar, bizim mobil bazar kiçikdir. Bununla belə rəqəmlərə nəzər salanda görmək olar ki, mobil sektorda əldə olunan gəlirlər də yetərincədir. Xüsusilə də pandemiya dövründə ölkəmizdə də rəqəmsal transformasiya gücləndiyindən, mobil internet istifadəçilərinin sayı kəskin artdığından mobil operatorlarımız da gəlirlərini yetərincə artıra biliblər".
