"Səsverməyə 1 gün qalıb. Qanunvericiliyə görə səsverməyə gələn seçici məntəqədə seçki bülleteni almaq üçün komissiya üzvünə şəxsiyyət vəsiqəsini təqdim etməlidir. Maraqlı məqam odur ki, artıq bizdə eyni hüquqi qüvvəyə malik 2 formada şəxsiyyət vəsiqəsi var: fiziki daşıyıcıda olan adi şəxsiyyət vəsiqəsi və rəqəmsal şəxsiyyət vəsiqəsi".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Buradan belə bir sual yaranr: Görəsən seçki günü "rəqəmsal şəxsiyyət vəsiqəsi" ilə səs vermək mümkün olacaqmı?
Osman Gündüz qeyd edib ki, yeni qanunvericiliyə görə artıq ölkədə myGov portalı üzərindən təqdim edilən şəxsi məlumatları özündə əks etdirən "rəqəmsal şəxsiyyət vəsiqəsi" ilə fiziki daşıyıcıda olan şəxsiyyət vəsiqəsi eyni hüquqi qüvvəyə malikdir.
O zaman belə qənaətə gəlmək olar ki, artıq Məntəqə Seçki Komissiyaları üzərində yalnız "rəqəmsal şəxsiyyət vəsiqəsi" olan və smartfonu vasitəsilə bunu təqdim edən seçiciləri də seçki məntəqəsində qarşılamağa hazır olmalıdırlar.
MyGov portalı üzərindən təqdim edilən "rəqəmsal şəxsiyyət vəsiqəsinin" doğruluğunu yoxlamaq, QR kod oxumaq üçün nəzərdə tutulan "myGov Checker" tətbiqi də komissiya üzvlərinin telefonlarına yüklənməlidir".
Ekspert bildirib ki, bununla bağlı izahedici materiallar nədənsə paylanmayıb və gözə dəymir. Güman ki, seçicinin daha müasir və yeni identifikasiya forması ilə bağlı təlimatlar komissiya üzvlərinə verilib.
"Ümid edirəm səsvermə günü "rəqəmsal şəxsiyyət vasiqəsi" ilə səs vermək istəyənlər problemlərlə üzləşməyəcəklər".
