TƏDBİRLƏR

Hazırda Rabitə və Yüksək Texnologiyalar Nazirliyinin (RYTN) Məlumat Hesablama Mərkəzində (MHM)  “Elektron Hökumət”  bülleteni üzrə növbəti brifinqi keçirilir.

Xeberler.az-ın məlumatına görə, brifinqdə jurnalistlərə ay ərzində görülən işlər, həyata keçirilən tədbirlər , sahə üzrə yeniliklər barədə məlumatlar verilir.

Tədbirdə qeyd edilib ki, RYTN Məlumat Hesablama Mərkəzi 2014-cü ildə aldığı İSO 27001:2005 sertifikatını yeniləyərək İSO 27001:2013 beynəlxalq standartı üzrə sertifikata layiq görülməklə öz inkişafında növbəti addım atıb, dünyanın nəhəng proqram təminatçısı olan Microsoft şirkətinin Gümüş tərəfdaşları sırasına daxil olub. MHM Microsoft şirkətinin sertifikatlaşdırılmış Gümüş tərəfdaşlığını qazanmaqla mütəxəssislərinin Microsoft texnologiyaları üzrə ekspertizadan keçməsini təsdiqləyib. Bu da müəssisəni Microsoft tərəfdaşlar siyahısında yerləşən dünyanın ilk 5 faiz şirkətlər sırasına daxil edib.

Brifinqdə müzakirə olunan digər məsələ isə Hökumət Ödəniş Portalı “Elektron Hökumət” Portalına inteqrasiya olunması ilə bağlıdır. 

Bildirilib ki, “Elektron Hökumət” portalına inteqrasiya edilmiş “Hökumət Ödəniş” portalı müxtəlif ödənişləri "Kommunal", "Rabitə", "İpoteka", "Büdcə" kimi qruplarda birləşdirir. Artıq portalda əks olunan "Kommunal bölməsi" vasitəsilə Azəriqaz, Azərsu, Azəristilik, Azərişıq (Bakı), Azərişıq (regionlar) üzrə ödənişləri operativ şəkildə icra etmək mümkün olacaq.

Belə ki, Portalın "Rabitə bölməsi" Azərcell, Nar Mobile, Bakcell, Stasionar Telefon Xidmətləri üzrə ödənişləri bir arada toplayır. Artıq vətəndaşlar rabitə borcunu vahid məkandan faydalanaraq ödəyə biləcəklər.

Tədbirdə qeyd edilib ki, Portalın  "İpoteka bölməsi" üzrə kreditin kodu daxil olunmaqla çevik ödəniş təmin ediləcək.

Portalın "Büdcə bölməsi"nə  Daxili İşlər Nazirliyi, Dövlət Gömrük Komitəsi, Dövlət Miqrasiya Xidməti, Dövlət Sosial Müdafiə Fondu, Energetika Nazirliyi, Fövqəladə Hallar Nazirliyi, Vergilər Nazirliyi, İqtisadiyyat və Sənayə Nazirliyi, Əmlak Məsələləri üzrə Dövlət Komitəsinin ödəniş xidmətləri inteqrasiya olunub. Bununla da artıq vətəndaşlar cərimə, dövlət rüsumu kimi ödənişləri portal üzərindən reallaşdıracaqlar.

Ruhəngiz Muradova