TƏNZİMLƏMƏ

Elektron Rəqabət İnformasiya Sisteminin (ERİS) fəaliyyəti, idarə olunması və istifadəsi ilə bağlı hüquqi, təşkilati və texnoloji əsaslar müəyyən edilib. Müvafiq Əsasnamə ERİS-in rəqabət və istehlakçı hüquqlarının müdafiəsi sahəsində müraciətlərin qəbulu, emalı və qərarların elektron qaydada təqdim edilməsini təmin etməsini nəzərdə tutur.

Xeberler.az bildirir ki, bununla bağlı Prezident İlham Əliyev "Elektron Rəqabət İnformasiya Sistemi haqqında Əsasnamə"nin təsdiq edilməsi barədə fərman imzalayıb.

Əsasnaməyə əsasən, ERİS istehlakçıların və bazar subyektlərinin müraciətlərinin real vaxt rejimində qəbulunu, digər dövlət qurumlarından zəruri məlumatların elektron sorğu əsasında əldə olunmasını, analitik təhlil və hesabatların hazırlanmasını, eləcə də xidmətlərin şəffaf, operativ və əlçatan formada göstərilməsini təmin edəcək.

Sistem vasitəsilə təbii inhisar subyektlərinə nəzarət, təsərrüfat subyektlərinin təmərküzləşməsi, antidempinq tədbirləri, istehlakçı müraciətləri və digər rəqabət qanunvericiliyi ilə bağlı müraciətlər elektron qaydada icra olunacaq. ERİS bir neçə altsistemdən ibarət olacaq və bütün proseslər vahid rəqəmsal platforma üzərindən həyata keçiriləcək.

Əsasnamədə ERİS-in texniki-texnoloji infrastrukturu, məlumatların mühafizəsi, “Hökumət buludu”nda saxlanılması, digər dövlət informasiya sistemləri ilə inteqrasiyası və informasiya təhlükəsizliyinin təmin olunması ilə bağlı müddəalar da öz əksini tapıb. Fərdi məlumatların toplanılması və işlənilməsi isə qanunvericiliyin tələblərinə uyğun həyata keçiriləcək.

Sənəddə ERİS-in sahibi, operatoru, iştirakçıları və istifadəçilərinin hüquq və vəzifələri də dəqiq müəyyənləşdirilib. Elektron xidmətlər “bir pəncərə” prinsipi əsasında təqdim olunacaq və istifadəçilər portal, mobil tətbiq və digər rəqəmsal kanallar vasitəsilə sistemdən yararlana biləcəklər.

ERİS-in tətbiqi ölkədə rəqabət mühitinin gücləndirilməsi, istehlakçı hüquqlarının daha effektiv qorunması, dövlət nəzarətinin rəqəmsallaşdırılması və xidmətlərin keyfiyyətinin artırılması baxımından mühüm addım kimi qiymətləndirilir.