E - HÖKUMƏT

Rabitə və Yüksək Texnologiyalar Nazirliyinin Azərpoçt MMC-də elektron ticarətlə bağlı geniş platformanın hazırlanması üzrə iş görülür. Yeni platformanın bu il istifadəyə verilməsi planlaşdırılır.

Nazirlikdən verilən məlumata görə, elektron ticarət göndərişlərinin poçtla çatdırılmasına görə rüsum ödənilır. Xaricdən göndərilən hər bir bağlama üzrə (çəkisindən asılı olmayaraq) 1,40 manat ödənilir. Bağlamanın ünvana çatdırılması üçün ödəniş 1 manatdır. Beynəlxalq daşımalarda qeydiyyatlı göndəriş 1 manata çatdırılır. Bağlamanın evə gətirilməsi 2 manat, çəkisi 500 qramdan artıq kiçik paketin poçt şöbəsində verilməsi isə 60 qəpikdir. Göndərişlərin poçt müəssisələrində saxlanılması da ödənişlidir. Beynəlxalq daşımalarda çəkisi 500 qramdan artıq qiymətli məktub, banderol və kiçik paketin saxlanılması (bildiriş yazıldığı gündən 5 gün sonra hər gün üçün) 20 qəpikdir. Bağlamanın saxlanması rüsumu isə (bildiriş yazıldığı gündən 5 gün sonra hər gün üçün) 30 qəpikdir.

Azərbaycan əhalisinin İnternet vasitəsilə alış-verişinin xeyli dərəcədə çoxalması daxil olan beynəlxalq poçt göndərişlərinin, xüsusilə də kiçik paketlərin sayını artırıb. Son üç ildə beynəlxalq kiçik paketlərin həcmində hər il əvvəlki illə müqayisədə 50 faizdən çox artım müşahidə olunub.

Xeberler.az