"Son aylar Elm və Təhsil Nazirliyi süni intellekt sahəsində diqqət cəlb edən ardıcıllıq
göstərir".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert qeyd edib ki, bir müddət əvvəl nazirliyin təşəbbüsü ilə Azərbaycan dilində və milli təhsil sisteminə uyğunlaşdırılmış ilk böyük dil modeli – belə demək mümkünsə, EduAzGPT ideyası üzərində işlərin başladığı açıqlanmışdı:
"Bu təşəbbüs çərçivəsində Elm və Təhsil Nazirliyinin rəsmiləri Dubayda Microsoft-un regional komandası ilə Azərbaycan üçün fərdi öyrənməyə uyğunlaşdırılmış AI modelinin – EduAzGPT-nin texniki planlaşdırılması müzakirə olunmuşdu.
İndi isə məlumat verilib ki, nazir Emin Əmrullayev BƏƏ-nin qabaqcıl AI texnologiya şirkəti “Presight” (G42 Group) ilə keçirilən görüşlərdə süni intellekt əsaslı həllərin “Rəqəmsal Məktəb” platformasına inteqrasiyasını müzakirə edib.
Yəni burada əsas müzakirə mövzusu bu AI modellərinin bizim bilik bazamız – yəni təhsil məzmunumuzla necə uyğunlaşdırılacağı və istifadəyə necə çıxarılacağıdır".
Ekspert düşünür ki, Elm və Təhsil Nazirliyinin bu istiqamətdəki ardıcıl səyləri xeyli diqqət cəlb edəndir:
"Əgər Presight kimi bir qlobal şirkət Azərbaycana gəlibsə və belə səviyyədə görüş keçirilibsə demək ortada ciddi niyyət var.
Yuxarıda qeyd olunan hər iki təşəbbüs bir-birini tamamlayır. Ətraflı açıqlama verilməsə də buradan belə qənaətə gəlmək olar ki, Elm və Təhsil Nazirliyi epizodik layihə yox, süni intellekt üzrə ciddi bir strategiya reallaşdırmaq istəyir.
Düşünmək olar ki, Elm və Təhsil Nazirliyi EduAzGPT ilə təməl və dil modeli qurmağı hədəfləyir, Aİ sahəsində dünyaca məşhur Presight ilə tətbiq və platformalaşma mərhələsini reallaşdırmaq niyyətindədir.
Çox güman ki məqsəd yalnız texnologiya gətirmək deyil, həm də onu Azərbaycan məzmunu ilə zənginləşdirərək milli AI modelinə çevirməkdir".
Osman Gündüzün fikrincə ETN-nin Microsoft və G42 kimi qlobal texnoloji şirkətlərlə əməkdaşlığı və süni intellekt əsaslı yerli resursların hazırlanması təhsilin və Aİ sektorun inkişafı baxımından faydalı və təqdirəlayiq addımdır.
