Ən çox istifadə olunan elektron xidmətlərin siyahısı açıqlandı
Rabitə və İnformasiya Texnologiyaları Nazirliyinin (RİTN) Məlumat Hesablama Mərkəzi tərəfindən (MHM) “Elektron hökumət” portalı vasitəsi ilə ən çox istifadə olunan elektron xidmətlərin siyahısı açıqlanıb. Siyahı ötən il dekabrın 1-dən 25-dək olan dövrü əhatə edir.
Bu müddətdə ən çox istifadə olunan Ədliyyə Nazirliyinin əhaliyə təqdim etdiyi “Adın mənası” e-xidmətidir. İstifadəçilər bu xidmətdən 672 dəfə yararlanıblar. İlin ən çox istifadə olunan e-xidməti RİTN-in təqdim etdiyi “Cari danışıqlar üzrə borc” xidmətidir ki, bundan da 613 nəfər istifadə edib.
Üçüncü yerdə olan Dövlət Sosial Müdafiə Fondunun “Sığortaolunanlar tərəfindən məlumatların əldə edilməsi” xidmətindən 600 dəfə istifadə olunub.
Daxili İşlər Nazirliyinin “fərdi məlumatların axtarışı” (427), Təhsil Nazirliyinin “Diplom haqqında məlumatlar” (356) xidmətləri də müvafiq surətdə 4-cü və 5-ci yerlərdə dayanırlar.
RİTN-in “Telefon üzrə ətraflı məlumat” (316), “Qəbzlər üzrə borc” (297), “ADSL-ə qoşulma/imtina” (274) və Dövlət Sosial Müdafiə Fondunun “Pensiyaçı tərəfindən məlumatların əldə edilməsi” (268) xidmətləri də ən çox istifadə olunan elektron xidmətlər sırasındadır./AzerTac/
