TEXNOLOGİYA

Bu yaxınlarda Facebook şirkətinin Süni intellekt laboratoriyasının (FAIR) tədqiqatçıları çat-botları təkmilləşdirməyə çalışarkən gözlənilməz yeniliyə imza atıblar.

Xeberler.az ict.az-a istinadən məlumat verir ki, dialoq agentləri kimi tanınan botlar öyrənmə prosesində qəflətən unikal dil yaradıblar.

Proqramlar maşın təlimi alqoritmləri sayəsində danışıq bacarıqlarını inkişaf etdirmək və təkmilləşdirmək üçün bir-biriləri ilə söhbət etməyə cəlb olunub. Bir müddətdən sonra, botlar verilmiş nümunələrdən yayınmağa və insanın təsiri olmadan yaradılan yeni dildə ünsiyyət saxlamağa başlayıblar. Bu dil linqvistika baxımından anlamsız görünsə də, maşınlar ifadələrin çoxsaylı təkrarı və ingilis dili konstruksiyalarının sadələşdirilməsinə əsaslanan ünsiyyətin bu formasını üstün tutublar.

Tədqiqatçılar həmçinin aşkar ediblər ki, botlar danışıqların aparılmasının olduqca orijinal modelindən istifadə edirlər. Maşın təlimi prosesində botlar zamanla kifayət qədər təcrübəli olublar və uydurma güzəştə nail olmaqla daha sonrakı mərhələdə onu “qurban vermək” üçün dialoqun bir predmetinə marağı simulyasiya etməyə başlayıblar.

Xatırladaq ki, çat-botlar həmsöhbətlərinin bütün xüsusiyyətlərini (xüsusilə neqativ) çox tez zamanda qəbul edirlər. 2016-cı ilin başlanğıcında Microsoft şirkətinin “İnsanlar çox əladırlar” ifadəsi ilə istifadəçilərlə ünsiyyətə başlayan botu cəmi 1 sutka ərzində irqçiliyə “yoluxub”, mizantrop (insanlara nifrət edən) olub, yəhudi və feministlərə nifrətini bildirib. Hətta şirkətin əməkdaşları istifadəçiləri təhqir etməyi dayandırması üçün botu söndürməyə məcbur olublar.

Xeberler.az