AZNET

Google Earth dünya xəritəsində Naxçıvan Muxtar Respublikasında yerləşən Kərki kəndi “Tigranashen” kimi adlandırılıb. Qeyd edək ki, bu, Azərbaycanın bölgə adlarının dəyişik və fərqli adlarla verilməsi ilk hal deyil.

Ölkəmiz haqqında yetərincə informasiyanın, fəal və savadlı internet istifadəçilərinin az olması nəticəsində internet xəritələrində gah Azərbaycan ərazisi təhrif edilir, Qarabağ, hələ bu azmış kimi Naxçıvan da Ermənistanın tərkib hissəsi kimi göstərilir, gah da Azərbaycanın ərazi adları tamamilə başqa dildə, başqa adda, bəzən də sırf erməni mənşəli adlarla qeyd edilir.

Xatırladaq ki, Google Earth xəritəsində coğrafi adlar, ərazilər istifadəçilər tərəfindən yaradılır. Qeydiyyatdan keçən hər bir internet istifadəçisi xəritədə dəyişiklik edə, ərazilərə adlar qoya və şəkillər yerləşdirə bilər.

Google günahkar deyil

Google Earth-də Kərki kəndinin “Tigranashen” kimi adlandırılmasına İKT üzrə mütəxəssis Cahid İsmayıloğlu belə münasibət bildirdi: "Bu, əslində Google-nin günahı deyil, Google Earth hər kəs üçün açıq imkan yaradıb. Dünyanın istənilən yerini işarələr ilə bu xəritədə müəyyən etmək olar. Məsələn mən öz yaşadığım yeri və ya işlədiyim məkanı burada işarələyə bilərəm. Bu zaman xəritədə ora yaxınlaşdıqda həmin iş yerinin və ya evin adı, ünvanı yazıla bilər. Kərki  kəndini “Tigranashen” olaraq böyük ehtimalla hansısa bir erməni fəalı qeydiyyata salmışdır və Google map-ə o ad ilə işarələnmişdir”.

Bəs günahkar kimdir?

Mətbuatda dəfələrlə internet məkanında Azərbaycana qarşı edilən təxtibatlar, Bingdə və Google-də ölkəmizin bölgə adlarının yalnış göstərilməsi məsələlərindən yazılıb. Bu kimi nöqsanların aradan qaldırılması üçün müxtəlif aidiyyatlı qurumlara, internet bilicilərinə müraciət etmişik. Belə qənaətə gəlmişik ki, Azərbaycanın dünya xəritəsində ərazisinin təhrif edilməsi, regionlarımizin erməni mənşəli adlarla göstərilməsinin günahkarını kənarda axtarmaq lazım deyil. Azərbaycanda savadlı internet istifadəçilərinin çox az olması, gənclərin daha çox əyləncə saytlarında və çatlarda vaxt keçirməsi  özümüzün bir nömrəli problemlərimizdən biridir. Azərbaycanlı gəncin əyləncəyə sərf etdiyi vaxtı erməni gənci ölkəsinin siyasi maraqlarını həyata keçirməklə məşğul olur. Təbii ki, erməni lobbiçiliyinin də burada böyük rolu vardır.

Xatırladaq ki, indiyədək Azərbaycan haqqında səhv və təhrif olunmuş informasiyanın düzəldilməsi ilə bağlı fəaliyyət göstərən heç bir internet qurumu yoxdur.

Vüsalə Əlövsətqızı
Milli.Az