QANUNVERİCİLİK

Həbsdə olan gənc bloqçular – Adnan Hacızadə və Emin Milli (Abdullayev) həbs olunduqları müddətdən bəri ilk dəfə olaraq  ailə üzvləri ilə görüşə biləcəklər. Bu barədə Reportyorların Azadlıq və Təhlükəsizlik İnstitutuna (RATİ) Adnan Hacızadənin atası Hikmət Hacızadə məlumat verib. Onun sözlərinə görə, Səbayel rayon Məhkəməsinin hakimi Araz Hüseynovun qərarına əsasən  noyabrın 25-də A. Hacızadənin, 26-da isə E.Millinin valideynləri  övladları ilə görüşə biləcəklər.

Xatırladaq ki, Emin Milli və Adnan Hacızadə 08 iyul tarixində  axşam saatlarında  dostları ilə Bakıda “Lebonese” (Livan) restoranında yemək yeyərkən qonşu masada onların söhbətini dinləyən idmançı görkəmli iki nəfər təxribatçı hücum edərək, Emin Milli və Adnan Hacızadəni döyərək, onlara xəsarət yetirib. Zərərçəkmiş şəxs qismində şikayət etmələrinə və xəsarət almalarına baxmayaraq, Səbail RPİ onlara xəsarət yetirənləri sərbəst buraxmış və döyülən gənclərin 48 saat müddətinə şübhəli şəxs qismində saxlanmasına qərar vermiş, iyulun 10-da isə Səbail rayon məhkəməsi “xuliqanlıq” maddəsi ilə təqsirləndirilən gənclər barəsində 2 aylıq həbs-qətimkan tədbirinin seçilməsi ilə bağlı qərar çıxarıb.  İyulun 20-də  Apellyasiya məhkəməsi sözügedən qərarı qüvvədə saxlayıb. İstintaq gənclərə qarşı Cinayət Məcəlləsinin 221.1.2 (xuliqanlıq) və 127 (qəsdən bədənə az ağır xəsarət yetirmə) maddələri ilə ittiham irəli sürmüş və Səbail rayon məhkəməsi noyabrın 11-də Emin Millinin 2 il 6 ay, Adnan Hacızadənin isə 2 il müddətinə azadlıqdan məhrum edilməsi barədə hökm çıxarıb.