TƏDBİRLƏR

İnnovasiya və Rəqəmsal İnkişaf Agentliyinin son illər həyata keçirdiyi müxtəlif təqaüd proqramlarından və layihələrdən 4 mindən çox qadın yararlanıb. Son 4 ilin məlumatları göstərir ki, informasiya kommunikasiya texnologiyaları (İKT) sahəsində təhsil alan qadınların sayı da artmaqdadır.

Xeberler.az məlumat verir ki, bunu rəqəmsal inkişaf və nəqliyyat nazirinin müavini Samir Məmmədov Ailə, Qadın və Uşaq Problemləri üzrə Dövlət Komitəsinin təşkilatçılığı ilə “İKT-də qadınlar” layihəsi çərçivəsində “Rəqəmsal sahibkarlıq” mövzusunda keçirilən müsabiqənin qaliblərinin mükafatlandırılması mərasimində bildirib.

"Kompüter sistemləri, informasiya texnologiyaları və təhlükəsizliyi sahələrində ali təhsil müəssisələrinə qəbul olan qadınlarım sayı dəfələrlə artıb. İnformasiya təhlükəsizliyi sahəsi ilə bağlı statistik göstəricilər xüsusilə yüksəlib. Qadınlar kibertəhlükəsizlik sahəsinə kifayət qədər maraq göstərirlər",- deyə o qeyd edib.

Nazir müavini diqqətə çatdırıb ki, İKT sahəsi, rəqəmsallaşma texnoloji tərəqqinin əsas istiqamətlərindən biri olmaqla yanaşı, dövlət siyasətində də prioritet mövqe tutur. “Rəqəmsal İnkişaf və Nəqliyyat Nazirliyi olaraq, bu sahənin bütün vətəndaşlar, o cümlədən qadınlar üçün əlçatan olmasını təmin etmək məqsədilə ardıcıl və məqsədyönlü tədbirlər həyata keçiririk”, - deyə S. Məmmədov vurğulayıb.