RƏQƏMSAL DÜNYA

27 yaşlı erməni Qevork Avanesov kibercinayətkarlıq, çirkli pulların yuyulmasında təqsirləndirilir İnterpol tərəfindən axtarışda olan 27 yaşlı erməni haker həbs edilib. Əslən erməni olan Rusiya vətəndaşı Qevork Avanesov bu ilin oktyabr ayının 1-dən Hollandiyada axtarışa verilib. O, cinayətkar qrupun üzvü kimi kibercinayətkarlıq, çirkli pulların yuyulması kimi maddələr üzrə axtarışda olub. Kibercinayətkarın Hollandiyada həbs edilməsi planlaşdırılsa da, Avanesov son anda marşrutunu dəyişərək Ermənistana uçub və elə aerportda yerli polis tərəfindən saxlanılıb. Bu, Rusiya hüquq mühafizə orqanlarının əməkdaşlarının işə cəlb edilərək, haker haqqında Hollandiya polisinin sorğusunu İrəvana ötürməsi sayəsində mümkün olub. Erməni dələduz qeyri-qanuni olaraq kompüter şəbəkəsinə daxil olmaqda, kodların sındırılmasında ittiham edilir.

Polisin məlumatına görə, 27 yaşlı haker dünyanın bütün kodu sındırılmış kompüterlərinin daxil olduğu şəbəkəyə rəhbərlik edib, bot-şəbəkələrdə (robot və network sözlərindən yaranıb. Şəbəkə adətən qeyri-qanuni fəaliyyətlər üçün - spam göndərilməsi, silinmiş sistemlərdə parolların bərpasında və s. istifadə edilir) ixtisaslaşmış başqa haker qrupları ilə əməkdaşlıq edib. Hollandiya prokurorluğunun açıqlamasına görə, Avanesov qeyri-qanuni fəaliyyəti nəticəsinə həftədə 100 min avro qazanc əldə edib. Onun \"əmək haqqı\"nın böyük hissəsi isə bot-şəbəkənin icarəsinə, qeyri-qanuni kommersiya əməliyyatlarının həyata keçirilməsinə, hücumlara, eləcə də spamların göndərilməsinə sərf edilib.

Qeyd edək ki, həbs edilməmişdən qısa müddət öncə haker Seyşel adalarından tətildən qayıdıbmış. Hobbi olaraq isə o, musiqi və bir neçə klubda DJ fəaliyyəti ilə məşğul olub. Onun işi barədə rəsmi məlumat yoxdur.