TƏDBİRLƏR

Bakalavrlar noyabrın 26-dan dekabrın 4-dək ərizələrini təsdiqlədə bilərlər

Respublikanın ali təhsil müəssisələrinin MBA və TEMPUS beynəlxalq proqramları üzrə magistraturasına və Azərbaycan Diplomatik Akademiyasının (ADA) magistraturasına sənəd qəbulu başlayır. Tələbə Qəbulu üzrə Dövlət Komissiyasından (TQDK) bildirilib ki, sənədlərin qəbulu internet vasitəsi ilə aparılacaq. Bunun üçün bakalavr şəxsiyyət vəsiqəsindən və "TQDK-nın ödəmə kartı"ndan  istifadə etməklə TQDK-nın müvafiq internet səhifəsinə (tqdk.gov.az/erizemagistr) daxil olmalıdır. Bakalavrlar ərizələrini təsdiq etdirmək üçün noyabrın 26-dan dekabrın 4-dək bazar günü istisna olmaqla, hər gün saat 9-dan 17-dək tələb olunan sənədləri təqdim etməlidirlər.

Azərbaycan Diplomatik Akademiyasının magistraturasına da ixtisasından asılı olmayaraq bütün bakalavrlar, eyni zamanda, magistrlər və bakalavr pilləsinin sonuncu kursunda təhsil alanlar sənəd verə bilərlər. TEMPUS proqramı üzrə isə yalnız müvafiq ixtisas istiqamətləri üzrə təhsil almış bakalavrlar sənəd verə bilərlər. Komissiyadan qeyd edilib ki, həmin ixtisasların siyahısı "Magistr" xüsusi buraxılışının 8-ci sayında nəşr edilib.

Qəbul prosesinə gəlincə, imtahanlar iki mərhələdə keçirilir. İmtahan suallarının cavablandırılmasına birinci mərhələdə 2 saat 30 dəqiqə, ikinci mərhələdə isə 1 saat 30 dəqiqə vaxt ayrılır. Birinci mərhələdə bakalavrın məntiqi təfəkkürü, informatika (Azərbaycan Diplomatik Akademiyasına daxil olmaq istəyənlərin riyaziyyat fənnini) və xarici dili bilmə səviyyəsi yoxlanılır. İkinci mərhələdə isə bakalavrın qəbul olmaq istədiyi ixtisas üzrə bilik səviyyəsinə diqqət yetirilir. Hər iki mərhələdə bakalavrın hər düzgün cavabı bir balla qiymətləndirilir, səhv cavablar düzgün cavabların nəticəsinə təsir göstərmir.