MOBİL RABİTƏ

Xəbər verdiyimiz kimi, Nazirlər Kabineti “Rabitə müəssisələri (operatorlar) tərəfindən rabitə vasitələrinin satışı və ifadəsi zamanı tələb olunan şərtlərin təsdiq edilməsi haqqında” qərarına dəyişiklik edib.

Dəyişikliyə əsasən, telefon nömrələrinin (sim kartların) satış qaydaları sərtləşdirilib.

Qaydalarda hansı dəyişikliklərin olması məsələsinə Azərbaycan İnternet Forumunun prezidenti Osman Gündüz aydınlıq gətirib.

O, Xeberler.az-a bildirib ki, yeni dəyişikliyə əsasən nömrə (simkart) alan şəxslə bağlı xeyli məlumatlar tələb olunacaq. Bir şəxsin nömrəsinin digər bir tərəfə verilməsinin qadağan olunması müqavilədə qeyd olunacaq:

“Telefon nömrələrinin, sim kartların satışı ilə bağlı qaydalar təkcə mobil operatorlara yox, həm də dilerlərə və adi mağazalara aid edilib.

Məlumatların dəqiqliyi yoxlanılacaq. Yəni, artıq vətəndaşın şəxsiyyət vəsiqəsindəki məlumatlar dəqiqləşmədən sim kartlar satılmayacaq.

Mobil operatorlarda olan mövcud abunəçilərin bazaları Elektron Hökumət portalına inteqrasiya olunacaq. Yəni, vətəndaş Elektron Hökumət portalına daxil olanda özünə aid olan bütün telefon nömrələrini özü görə biləcək.

Artıq müqavilə olmadan hansısa nömrəni işlətmək mümkünsüz olacaq. İndiyə qədər nömrələrin kiminsə adına olmadan da şəbəkədə istifadəsi mümkün idi. Amma indi o da mümkünsüz olacaq”.

Osman Gündüz qeyd edib ki, müqavilədə qeyd olunacaq ki, sizin adınıza veriləcək olan sim kartın başqasına verilməsi qadağandır: “Qaydalarda həmçinin nömrə və telefon itirilərsə dərhal polisə məlumat vermək tələbi də öz əksini tapıb”.

Osman Gündüz bunun  əhəmiyyəti məsələsinə də toxunub. O bildirib ki, vətəndaşların mobil telefon nömrələri ilə bağlı məlumat bazaları, məlumatlar dəqiqləşəcək: “Məlumatlar Elektron Hökumət portalına inteqrasiya olunacaq və nömrələr dəqiqləşəndən sonra hər bir nömrənin arxasında bir adam dayanandan sonra bu nömrə üzərindən artıq müxtəlif xidmətlər verilməyə başlanacaq. Yəni hökumət və ya istənilən digər qurum istənilən yerdə istənilən xidmətini vətəndaşın mobil telefonuna da ötürə biləcək. Həmçinin düşünürəm ki, bu nömrələrdən sui-istifadə edərək qeydi-qanuni addımlar atılmasının da qarşısını alına biləcək”.

Osman Gündüz vətəndaşlarla bağlı toplanan informasiya bazalarının təhlükəsizliyinin təmin edilməsi, qanunsuz olaraq digər tərəflərə verilməsinin qarşısının alınması istiqamətində də ciddi addımlar atılmasının vacibliyini bildirib.

Ruhəngiz Muradova