Osman Gündüz: «sosial media hansısa inqilabda katalizator ola bilər, amma əsas ola bilməz»

13-03-2013 / 18:47
Eynulla Fətullayev rəhbəri olduğu haqqın.az saytında yaydığı məqalədə Azərbaycanda fəaliyyət göstərən Milli Demokratiya İnstitutunun ölkədə “facebook inqilabı”nı reallaşdırmaq üçün 2 milyon dollar maliyyə vəsaiti ayırdığını iddia edib. Məqalədə həmçinin Azərbaycanda olduğu üç il ərzində institutun rəhbəri Aleks Qriqoryevsin yerli banklardakı hesabından təxminən 2 milyon dollara yaxın pul çıxartdığı, lakin həmin pulun hansı istiqamətdə xərclənməsi ilə bağlı institutun rəsmi saytında heç bir məlumat verilmədiyi qeyd olunur.
Azərbaycan Diplomatik Akademiyasının dosenti Elnur Soltanov isə “Facebook inqilabı”nın mümkünlüyünə inanmır: “İnandırıcı deyil. Göstərilən pul çox cuzi miqdardır, həm də Azərbaycan gerçəkləri ilə müqayisədə 2 milyon heç bir şeydir. Bu niyyətlə ortaya pul atılıb-atılmadığını bilmirəm, amma əgər atılıbsa, bu qədər kiçik miqdarla belə hadisəni reallaşdırmaq qeyri-mümkündü. Bunu ABŞ-ın marağı kimi qələmə vermək olmaz. ABŞ üçün Azərbaycanla strateji əməkdaşlıq daha sərfəlidir. Bəzi səhvlər ola bilər. Yenə deyirəm vəsait o qədər azdır ki, bu, ciddiyə alınacaq bir şey deyil fikrin emprik qaynağını, haradan qaynaqlandığını demək lazımdır”. 
E.Soltanovun sözlərinə görə, facebook-un istifadəsi pula bağlı bir şey deyil: “Facebook inqilabı ortaya pul qoymaqla reallaşdırıla biləcək bir şey deyil. Azərbaycanda inqilaba ehtiyac varmı, yoxmu bu başqa mövzudu. Düşünürəm ki, Azərbaycanda ən yaxşı variant dialoqdur”. 
Azərbaycan İnternet Forumunun prezidenti Osman Gündüz facebook-un yalnız katalizator ola biləcəyini deyir: “Ərəb ölkələrindəki inqilablardan sonra belə bir termin yayıldı – sosial media inqilabı. Düşünmürəm ki, sosial media inqilab edə bilər, bunlar yanlış təsəvvürlərdir. Sadəcə, insanlar sosial media vasitəsilə daha çox xəbərləşə, daha çox sosiallaşa bilər. İntensiv əlaqə qura bilirlər. Sosial media hansısa inqilabda katalizator ola bilər, amma əsas ola bilməz. İnqilab üçün sosial, siyasi, iqtisadi səbəblər olmalıdır. Sosial mediadan istifadə edir, müzakirələr aparırlar, bu da normal bir haldır”. 
Politoloq Cümşüd Nuriyevin fikrincə isə E.Fətullayevin iddiasının ciddi əsası ola bilər: “Mən Eynulla Fətullayevi araşdırmaçı jurnalist kimi tanıyıram. Onun əlində yoxlanmış, ciddi məlumat olmasa onu yazmaz. O yazını mən də oxudum və orada göstərilən miqdarların Açıq Demorkatiya İnstitutu vasitəsilə xərclənməsinə şübhə etmirəm. Vəsaitlərin ayrılması ona görə lazımdır ki, gəncləri təşkilatlandırmaq, həbs olunanda onları maddi baxımdan təmin etmək və s. bu kimi işlər mümkün olsun. Ciddi və düzgün informasiyadır”.
C.Nuriyev təklif edir ki, Azərbaycanın daxili işinə qarışdığına görə Xarici İşlər Nazirliyi tədbir görməlidir: “Milli Təhlükəsizliyə toxunacaq hər hansı hal olarsa, dövlət bununla bağlı tədbir görməlidir. Ona görə yaxşı olar ki, bu informasiyalar dəqiqləşdirilsin. O institutun Azərbaycandakı nümayəndəliyi də araşdırılsın”.
Yazının müəllifi Eynulla Fətullayev isə fikirlərinin üstündə qalır: “Mən hamısını yazımda qeyd etmişəm. Kim nə deyir-desin mən öz fikirlərimi yazmışam və üstündə dururam”.
Fatimə Kərimli, hafta-ichi.az

ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.