RƏQƏMSAL DÜNYA

Dünyanın ən nəhəng sosial şəbəkəsi Facebook-dur. Bir çox ölkələrdə Facebook-a giriş qadağan edilib. Analoji hadisə Azərbaycanda baş verə bilərmi?

Milli Məclisin deputatı Fuad Muradov Facebook-la bağlı SİA-ya açıqlama verib: “Hələlik bu barədə rəsmi və ya qeyri-rəsmi məlumat yoxdur. Hazırda Azərbaycanda hər cür şərait yaradılıb ki, gənclərimiz sosial şəbəkədən istədikləri kimi istifadə etsin. Bununla bağlı heç bir problem yoxdur. Bu gün Facebook istifadəçilərinin sayı dünyada olduğu kimi Azərbaycanda da çoxdur. Ancaq deyə bilmərəm ki, Facebook ölkəmizdə çox populyardır. Doğrudur, yetərincə istifadə edən var. Düşünürəm, dövlətin həyata keçirdiyi tədbirlər var, çünki terrorizmi yayan çağırışlar bəzi Facebook səhifələrində mövcuddur. Bunun da bizim müvafiq dövlət qurumlarımız məşğul olur. Düşünmürəm, belə məsələyə ehtiyac var. Yaxın gələcəkdə ölkəmizin Facebook-dan imtina etməsini gözləmirəm. Əgər belə bir hal baş verərsə alternativ şəbəkələr olmalıdır ki, gənclər istifadə etsin. Əvvəllər bu cür sosial şəbəkələr olmayıb. O demək deyil ki, Azərbaycan gəncləri öz işlərini görməyiblər. Ona görə də mən bu məsələni o qədər də ciddi hesab etmirəm”.

Azərbaycan İnternet Forumunun prezidenti, “Multimedia” İnformasiya Sistemləri və Texnologiyaları Mərkəzinin direktoru Osman Gündüz də münasibət bildirib: “Düşünürəm, ölkəmizdə Facebook sosial şəbəkəsinin bağlanacağı haqqında yayılan söz-söhbətlər əsassızdır. Qlobal informasiya resurslarını Azərbaycan ərazisində qadağan olunması ilə bağlı dövlətin qərar çıxaracağına inanmıram. Çünki qonşu ölkələrin təcrübəsi göstərir ki, həm Türkiyədə, həm Rusiyada da cəhd olundu. Lakin heç bir ölkədə bu müsbət nəticə vermədi. Hesab edirəm, dövlət nümayəndələri də Facebook-dan, sosial mediadan daha effektiv istifadə etməyə çalışırlar, nəinki qadağan etməyi düşünürlər. Elektron hökumətlə bağlı dövlət qurumları Facebook, Twitter və başqalarına inteqrasiya edib. Dövlətin özü xidmətlərini vətəndaşlara çatdırmaq üçün sosial mediadan daha çox istifadə edir. Ölkədə Facebook-un bağlanmasından söhbət gedə bilməz”.