12 nömrəli tam orta ümumtəhsil məktəbində şagirdlərin davamiyyətinin izlənməsi məqsədilə QR kod əsaslı “Elektron davamiyyət” sistemi tətbiq edilməyə başlanıb.
Xeberler.az bildirir ki, Bakı şəhəri üzrə Təhsil idarəsindən verilən məlumata görə, yeniliyin əsas məqsədi dərsə davamiyyətin rəqəmsallaşdırılması, valideyn-məktəb əlaqələrinin gücləndirilməsi və şagirdlərin təhlükəsizliyinin daha effektiv şəkildə təmin olunmasıdır.
Yeni sistemə əsasən, hər bir şagird üçün xüsusi QR kod yaradılıb. Şagirdlər məktəbə daxil olarkən bu kodlar vasitəsilə avtomatik qeydiyyatdan keçirlər. Bu isə davamiyyətin real vaxt rejimində həm məktəb rəhbərliyi, həm də valideynlər tərəfindən izlənilməsinə imkan yaradır.
“Elektron davamiyyət” sistemi vasitəsilə:
- Şagirdlərin məktəbə giriş vaxtı dərhal qeydə alınır;
- Valideynlərin “WhatsApp” nömrəsinə anında bildiriş göndərilir;
- Gecikmə və davamiyyət statistikası rəqəmsal baza üzərindən şəffaf şəkildə aparılır.
Pilot layihə hazırda 10 sinifdə tətbiq olunur və yaxın günlərdə bütün sinifləri əhatə etməsi planlaşdırılır.
Qeyd olunur ki, sistemin tətbiqi təhsil prosesinin daha şəffaf idarə olunmasına, eləcə də müasir texnologiyaların təhsil mühitinə inteqrasiyasına töhfə verəcək.
