TEXNOLOGİYA

Qazaxıstanın CYBERPACK.AI startapı Telegram-ın təsisçisi Pavel Durov tərəfindən 25 min dollar məbləğində dəstək qazanıb. Fond Digital Bridge 2025 beynəlxalq forumunda Astana Hub Battle finalında startapın təqdimatı zamanı təsisçinin diqqətini çəkib.

Xeberler.az bildirir ki, alınan vəsait istehsalın miqyasını genişləndirmək, mobil tətbiq və süni intellekt modulunu inkişaf etdirmək, komandanı – proqramçılar, mühəndislər və metodistləri – artırmaq, həmçinin regionlarda təhsili inkişaf etdirmək və beynəlxalq bazara çıxmaq üçün istifadə olunacaq.

Qeyd edək ki, CYBERPACK.AI STEAM (elm, texnologiya, mühəndislik, sənət və riyaziyyat) sahəsində uşaqlar üçün mobil tətbiq, veb-platforma və təhsil konstruktları təqdim edir. Layihəyə həmçinin müəllimlər üçün veb-platforma, metodik proqram, pedaqoji təlimlər və yarış sistemləri daxildir. Bu yanaşma 7–18 yaş arası şagirdlərə elmi layihələr yaratmaq, olimpiadalara hazırlaşmaq və texniki universitetlər üçün elmi portfoliolar hazırlamaq imkanı verir.

Startap bir il ərzində məhsulunu Qazaxıstan və Azərbaycan üzrə 70 məktəbə tətbiq edib və ICRC beynəlxalq yarışlarını təşkil edib. Komanda Astana Hub-un Startup Garage inkubasiya proqramından keçərək məktəblərin sayını 10 dəfə artırıb, beynəlxalq bazara çıxıb və miqyaslandırma üçün sistemli prosesləri qurub.

Qeyd edək ki, Pavel Durov Digital Bridge 2025 forumunda Qazaxıstanda süni intellekt laboratoriyasının açılacağını elan edib və bu texnologiyanın milli və qlobal istifadəçilər üçün təhlükəsiz, şəffaf və effektiv AI imkanları təmin edəcəyini bildirib.