TEXNOLOGİYA

Məşhur mesajlaşma platforması Telegram Mərkəzi Asiyanın aparıcı innovasiya və texnologiya mərkəzlərindən biri olan Astana Hub-un rəsmi iştirakçısına çevrilib.

Xeberler.az bildirir ki, məlumat mərkəzin rəsmi internet səhifəsində yayımlanıb.

Telegram-un Astana Hub-un üzvü kimi tanınması şirkətə Qazaxıstan dövləti və yerli informasiya texnologiyaları mütəxəssisləri ilə birbaşa əməkdaşlıq imkanı verəcək. Bununla yanaşı, bu tərəfdaşlıq Telegram-a yerli bazar üçün xidmətlərin, reklamların və məzmunun inkişaf etdirilməsi üçün yeni imkanlar açacaq.

Rəsmi açıqlamada qeyd olunur ki, Telegram-un Astana Hub ekosistemində iştirakı rəqəmsal məhsulların hazırlanması, təcrübə mübadiləsi və beynəlxalq əməkdaşlıq baxımından mühüm imkanlar yaradacaq. Şirkət həm yerli, həm də qlobal səviyyədə ortaq layihələrin həyata keçirilməsini nəzərdə tutur.

Bu əməkdaşlığın əsası 2024-cü ilin iyun ayında Telegram-un qurucusu Pavel Durovun Qazaxıstana səfəri zamanı qoyulub. O, Qazaxıstanın Rəqəmsal İnkişaf, İnnovasiyalar və Aerokosmik Sənaye naziri Jaslan Madievin dəvəti ilə ölkəyə gəlmiş və Astana Hub-un infrastrukturu, startaplara dəstək proqramları və texnoloji potensialı ilə tanış olmuşdu.

2024-cü ilin oktyabr ayında isə nazir Madiev Telegram ilə razılaşma əldə edildiyini və şirkətin Qazaxıstanda rəsmi ofis açacağını, eləcə də yerli nümayəndə təyin olunacağını elan etmişdi.

2018-ci ildə yaradılmış Astana Hub, ölkədə informasiya texnologiyaları startaplarının inkişafına dəstək göstərən və xarici mütəxəssisləri cəlb edən innovasiya mərkəzidir. Mərkəzin ərazisində iştirakçılar üçün xüsusi vergi güzəştləri və hüquqi üstünlüklər tətbiq olunur. Həmçinin, xarici rezidentlər üçün vizalar və əmək icazələri sadələşdirilmiş şəkildə verilir.

Telegram-un bu addımı şirkətin regionda fəaliyyətini genişləndirməklə yanaşı, Qazaxıstanın rəqəmsal inkişaf hədəflərinə də mühüm töhfə verəcək.