E - HÖKUMƏT

Azərbaycan Qiymətli Kağızlar üzrə Dövlət Komitəsinin (QKDK) rəsmi internet səhifəsinin  yeni versiyası istifadəyə verilib.

Komitənin İctimaiyyətlə Əlaqələr şöbəsindən Xəbərlər-ə verilən məlumata görə, 19 may 2015-ci il tarixindən Azərbaycan Respublikasının Qiymətli Kağızlar üzrə Dövlət Komitəsinin (QKDK) rəsmi internet səhifəsinin yeni versiyası istifadəyə verilib.

Azərbaycan və ingilis dillərində fəaliyyət göstərən yeni internet səhifəsi ictimaiyyət arasında yerli kapital bazarı üzrə təbliğatın daha da gücləndirilməsinə və əhalinin bu sahədə məlumatlılıq səviyyəsinin artırılmasına xidmət edir.

Yeni internet səhifəsində investorlar, emitentlər və maliyyə vasitəçiləri üçün faydalı məlumatlar əksini tapmış və onların bazarda fəaliyyəti barədə ətraflı informasiyaya yer verilmişdir. Həmçinin, kapital bazarı göstəriciləri haqqında məlumatlar  fərqli tərtibatda və geniş formada yenidən işlənib hazırlanaraq saytın istifadəçilərinə təqdim olunmuşdur.

Saytda broker, diler, depozitar, klirinq və digər peşəkar bazar iştirakçılarının fəaliyyət istiqamətləri haqqında daha dolğun məlumatlar yerləşdirilmişdir. İstifadəyə verilən internet səhifəsində QKDK tərəfindən elektron xidmətlər, vətəndaşların qəbulu, video-qəbul bölmələri təkmilləşdirilmiş, sorğu paneli, həmçinin bir sıra digər yeni funksiyalar əlavə edilməklə, informasiya texnologiyalarının üstünlükləri və müasir dövrün tələbləri nəzərə alınmışdır.

Sevinc Çəltikova