Azərkosmos ASC-nin internet səhifəsi fəaliyyətə başlayıb
05-06-2012
17:13
Rabitə və İnformasiya Texnologiyaları Nazirliyinin Azərkosmos ASC-nin internet səhifəsi istifadəyə verilib.
Azərbaycanda və Qafqazda ilk peyk operatoru olan AZ ASC-nin internet saytının istifadəyə verilməsi ictimaiyyətin kosmik sənaye ilə bağlı ümumi məlumatlılıq səviyyəsinin artırılması, strateji əhəmiyyət kəsb edən peyk layihələrinin icra vəziyyəti barədə vahid məlumat bazasının yaradılması, habelə qurumun öz fəaliyyətini ictimaiyyətlə qarşılıqlı əlaqələr zəminində qura bilməsi baxımından əlamətdar hal hesab edilir.
İnternet səhifəsində Azərkosmos-un yaranma səbəbləri və tarixi, məqsəd və fəaliyyət istiqamətləri, qanunvericilik əsası, təşkilati quruluşu, idarəetmə üsulları, vakansiyalar və işəgötürmə qaydaları kimi ümumi məlumatlarla yanaşı, 2012-ci ilin sonunda orbitə buraxılması planlaşdırılan ilk telekommunikasiya peykinin əhatə dairəsi, peyk vasitəsilə göstəriləcək xidmət növləri, peyki idarəetmə mərkəzləri barədə ətraflı məlumatlar da öz əksini tapıb.
