SOSİAL MEDIA

Mərkəzi Seçki Komissiyasının sədri Məzahir Pənahov fevralın 6-da keçirilən toplantıda bildirib ki, seçki zamanı təşviqat prosesinin tənzimlənməsində sosial şəbəkələr problemlər yaradır. O qeyd edib ki, sosial şəbəkələr MSK üçün pis vəziyyət yarada bilər, bəzən kimsə hansısa namizədi tənqid edir, bunun özü də təşviqat sayılır. 

M.Pənahov beynəlxalq təşkilatların nümayəndələri ilə məsləhətləşib sosial şəbəkələrin seçki prosesində fəaliyyəti ilə bağlı müvafiq addımlar atılacağını bildirib.

Məsələ ilə bağlı Azərbaycan İnternet Forumunun prezidenti, eskpert Osman Gündüz Xeberler.az-a bildirib ki, sosial şəbəkələrin, İnternetin məhdudlaşdırılması seçki qanunvericiliyində nəzərdə tutulmayıb:

“İnternet media resurslarının bloklanması ötən il qəbul edilən “İnformasiya, informasiyalaşma və informasiyanın mühafizəsi ” haqqında qanuna edilən dəyişikliklərdə nəzərdə tutulub. Fikrimizicə, tam əksinə olmalıdır. Hazırda ölkədə təbliğat-təşviqatın daha effektiv qurulması üçün, ictimai müzakirələr üçün, geniş auditoriyaya əlçatımlıq üçün ən ucuz vasitə elə sosial mediadır. Bu baxımdan seçkilərin demokratik keçirilməsini təmin etmək üçün hökumət maraqlı olmalıdır ki, namizədlər sosial mediadan effektiv və qanunlara uyğun olaraq istifadə etsinlər”.

Onun sözlərinə görə, əgər kimsə sui istifadə , təhqir –böhtanlar edərsə, o, məsuliyyət daşıyacaq:

“Bu tip hüquq pozmaları ilə bağlı presedentlər də bizdə kifayət qədər olub. Buna görə Facebook və ya hansısa digər sosial media vasitəsini ölkə ərazisində tamam olaraq bağlamağa ehtiyac yoxdur”.

Espert vurğulayıb ki, indiyədək olan siyasi proseslər zamanı heç bir halda sosial media ölkə ərazisində qapadılmayıb:

“Yalnız ötən illərdə bəzi sosial media vasitələrində video bağlantılara məhdudiyyətlər qoyulub. Bir daha qeyd etmək istərdik ki,  ölkədə “KİV haqqında qanun”a görə İnternet, o cümlədən də sosial media kütləvi informasiya vasitəsi sayılır. Seçki qanunvericiliyi isə yalnız büdcədən maliyyələşən mediada namizədlərə bərabər imkanlar yaradılmasını nəzərdə tutur. Digər media, o cümlədən sosial media vasitələrindən istifadə olunmasında namizədlər sərbəstdir”.

Xeberler.az