Seçkilər ərəfəsində sosial media məhdudlaşdırıla bilərmi?

28-03-2018 / 16:20

Son günlərdə ölkədə sosial medianın seçki öncəsi məhdudlaşdırılmasına yönələn çağırışlar edilir. Belə ki, bu gün də Milli Məclisin komitə sədri Hadı Rəcəbli bu istiqamətdə açıqlamalar verib. 

Məsələ ictimaiyyətdə birmənalı qarşılanmayıb. Mövzu ilə bağlı sosial mediadada ekspert və digər mütəxəssislərin ciddi müzakirəsi ilə qarşılaşırıq.

Görəsən, həqiqətən də Prezident seçkiləri ərəfəsində sosial media məhdudlaşdırıla bilərmi?

Azərbaycan İnternet Forumunun prezidenti, ekspert Osman Gündüz məsələni Xeberler.az-a şərh edib.

Onun sözlərinə görə, Azərbaycanın indiki inkisaf səviyyəsində sosial medianı məhdudlaşdırmaq ideyası, ümumiyyətlə, bunun müzakirəsi yolverilməzdir:

“Hesab edirik ki, biz artıq o mərhələni keçmişik. Bundan daha çətin ictimai-siyasi proseslər dövründə Azərbaycan İnternetində hər hansı məhdudiyyətlər olmayıb”.

Ekspert sosial mediadan, həmçinin elektron mediadan söyüş, təhqir, böhtan və insanları aşağılamaq üçün istifadəni, manipulyasiya üçün istifadəsini də yolverilməz hesab edir:

"Eyni zamanda, gündəlik həyatımızın bir hissəsinə çevrilən, real dünyamızın inikası olan, açıq bir qlobal şəbəkədə hansıa bir qeyri-qanuni açıqlamaya, kiminsə tərəfindən olan paylaşıma da aşırı bir münasibət sərgilənməsinə, aşırı səviyyədə qabardılmasına, ictimai rəy olaraq təqdim edilməsinə də lüzum görmürük . Ayrı-ayrı istifadəçilər tərəfindən qlobal resurslarda aparılan qanuna zidd, etikadan kənar hərəkətlərə qarşı daha çox ictimai qınağa üstünlük verilməsini arzulayırıq”.

Forum prezidenti sosial medianın Azərbaycan seqmentindən dövlətin və cəmiyyətin inkişafına yönəlik müzakirələr aparılmasının faydalı olacağını düşünür:

“Bizim özümüzün bu tip qlobal resurslara, qlobal platformalara daha çox ehtiyacımız var. Təbii ki, rəsmi qurumlar platformalarda bu cür qeyri-qanuni hərəkətlərin qarşısının alınması istiqamətində milli qanunvericilik və beynəlxalq normalar çərçivəsində zəruri addımlar atmalıdır. Düşünürük ki, Azərbaycanın strateji maraqları daha çox qlobal informasiya resursları, sosial media ilə əməkdaşlığı diqtə edir. Xüsusilə də son dövrlərdə resurslarda vətəndaşlarla bağlı informasiyaların 3-cü tərəflərə verilməsi, bu tip resurslar vasitəsilə manipulyasiya aparılması, fikrimizcə hökuməti də ciddi düşündürməlidir. Bu baxımdan rəsmi qurumların qlobal resurs sahibləri ilə əməkdaşlığına, onların nümayəndəliklərinin burada açılmasına, informasiya bazalarının burada yerləşdirilməsinə, onlarla normal informasiya münasibətlərinin qurulmasına üstünlük verməsini arzulayırıq”.

Osman Gündüz onu da bildirib ki, bəzən hansısa bir məmurun, hökumət rəsmilərinin bu tip məsələlərlə bağlı çıxışlarında ziddiyyətlər müşahidə olunur və bu da bəzən lazımsız nəticələr verir:

"Müasir qlobal dünyada mövcud resursların nəyinsə qarşının alınmasından daha çox faydalı kontentin hazırlanmasına yönləndirilməsi, qlobal resursların faydalı tərəflərindən istifadənin güücləndirilməsi daha vacbdir. Bu baxımdan indiki məqamda dövlətin və cəmiyyətin inkişafı üçün, informasiya sahəsində milli maraqlarımızın qorunması üçün sosial medianın gücündən, onun imkanlarından daha effektiv istifadəyə yönələn konseptual sənədlərin hazırlanmasını vacib hesab edirik”.

Məltəm Talıbzadə

 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.