İKT VƏ SEÇKİ

Məlum olduğu kimi, Prezident İlham Əliyev Milli Məclisə seçkilərin təyin edilməsi haqqında sərəncam imzalayıb. Sərəncamda qeyd edilib ki, Azərbaycan Respublikasının Milli Məclisinə seçkilər 2015-ci il noyabrın 1-nə təyin edilsin.

Artıq noyabrın 1-nə təyin edilmiş parlament seçkilərində 25 nəfər deputatlığa namizədliyini irəli sürüb. Bunu ötən gün  Mərkəzi Seçki Komissiyasının iclasında MSK sədri Məzahir Pənahov söyləyib.

Xeberler.az-ın məlumatına görə, artıq deputatlığa namizədliyini irəli sürənlər imza toplamaq üçün internetin, eləcə də sosial medianın imkanlarından istifadə etməyə başlayıb.

Belə ki,  namizədliyi irəli sürənlərdən REAL siyasi hərəkatının İdarə Heyətinin üzvü Erkin Qədirli özünün Facebook səhifəsi vasitəsilə seçicilərinə  çağırış edərək onlardan dəstək istəyib.

Tanınmış yazar Aysel Əlizadə də  deputatlığa namizədliyin irəli sürənlər sırasındadır.

Aysel Əlizadə Xeberler.az-a açıqlamasında bildirib ki, imza toplamaq üçün sosial medianın imkanlarından istifadə edəcək: “Sosial mediada xeyli izləyicim, dostum, oxucum var. Onların köməyindən yararlanmağı düşünürəm. Bizim maddi resursumuz güclü deyil, ancaq insan resursumuz var. İllərlə qazandığım sayğıya, sevgiyə arxalanıb seçkiyə qatılmaq qərarına gəlmişəm”.

Deputatlığa namizədliyə iddialı olanlardan sosial media üzrə ekspert Azər Həsrət istənilən halda sosial mediadan geniş şəkildə istifadə edəcəyəni bildirib.

O, Xeberler.az-a bildirib ki, seçki kampaniyasında sosial medianın ona böyük köməyi olacaq: “2010-cu ildən bu sahədə  təcrübəm var. Sosial media üzərindən istər təbliğatın qurulması, istər onlayn platformada həyata keçirilən seçkilərdə iştirak edib qalib gəlmək baxımından  bir neçə internet sayt üzərindən həyata keçirilən səsvermələrdə I yeri qazanmağı bacarmışam. Bu da məhz sosial medianın gücü hesabına olub. Qələbəmi təmin edən əsas amil sosial mediadan istifadə etməyim idi. Yəni mən vaxtında sosial mediadan güclü istifadə etmişdim. Nəticə etibarilə onlayn səsvermədə qalib oldum. Bu il də namizədliyimi irəli sürəcəyim seçkilər zamanı sosial medianın gücündən istifadə edəcəyəm. Deyə bilərəm ki, artıq 2010-cu ildən fərqli olaraq 2015-ci ildə Azərbaycanda sosial media hər bir fərd üçün əlçatımlıdır. Bu baxımdan düşünürəm ki, seçki kampaniyasında sosial media mənə kömək edəcək”.

Mirvari Nəcəf