PROQRAMLAR

Yanvarın 30-da Gənclərin İnkişaf və Karyera Mərkəzinin təşkilatçılığı, Gənclər Fondunun və Azərbaycan İnnovasiya Mərkəzinin tərəfdaşlığı ilə “Şəxsi inkişafda innovasiya və rəqəmsallaşmanın rolu” mövzusunda forum keçirilib.

Xeberler.az məlumat verir ki, Azərbaycan Gəncləri Gününə həsr olunan forumun əsas məqsədi rəqəmsallaşma və innovasiyanın şəxsi inkişafa təsiri, gənclərin müasir dövrün tələblərinə uyğun bacarıqlarının formalaşdırılması, eləcə də bu istiqamətdə dövlət və özəl sektor tərəfindən həyata keçirilən təşəbbüslər barədə məlumatlılığın artırılması olub.

Açılış mərasimində İnnovasiya və Rəqəmsal İnkişaf Agentliyinin Texnoparklar ilə iş şöbəsinin müdiri Elvin Hacıyev agentliyin Azərbaycanda innovasiya ekosisteminin inkişafına bir neçə prizma üzərindən yanaşdığını vurğulayıb. Onun sözlərinə görə, əsas məqsəd ekosistem qurucularını bir araya toplamaq və onlara dəstək göstərməkdir. Elvin Hacıyev texnologiya və innovasiya sahəsində maarifləndirməni gücləndirmək, eləcə də birgə yeni layihələrin formalaşması üçün əlverişli mühit yaratmaq məqsədilə davamlı olaraq tədbirin təşkil edildiyini də diqqətə çatdırıb.

Gənclərin İnkişaf və Karyera Mərkəzinin Baş direktoru Azər Əliyev isə hər iki qurumun bu günə qədər birgə bir çox uğurlu layihələr reallaşdırdığını deyib: “Gənclərin əmək bazarında rəqabətə davamlı və hazırlıqlı olması son dərəcə vacibdir. Bunun üçün isə hər bir gəncin öz üzərində davamlı şəkildə çalışması əsas şərtdir”.

Forum çərçivəsində “Şəxsi inkişafda innovasiya və rəqəmsallaşmanın rolu” mövzusunda panel müzakirəsi keçirilib. Gənclərin şəxsi inkişafında innovativ və rəqəmsal layihələrin rolu, rəqəmsallaşma dövründə fərdi inkişaf üçün strateji yanaşmalar, innovasiya ekosisteminin şəxsi inkişafa təsiri, eləcə də rəqəmsal bacarıqların və innovativ düşüncənin investisiya dəyəri ətrafında müzakirələr aparılıb. Çıxışçılar innovasiya və rəqəmsal dəyişimin insan kapitalının inkişafında rolu, gənclərin bu proseslərə adaptasiyası və mövcud imkanlar haqqında məlumat veriblər.

Sonda mövzu ilə bağlı suallar cavablandırılıb, gənclərin fikir və təklifləri dinlənilib.