AZNET

AEGEE-Bakı Avropa Tələbələr Forumu təşklilatı tərəfindən həyata keçirilən “YazYay Məktəbi” çərçivəsində iyun ayında “Sosium” sosial bloq yazıları müsabiqəsi keçiriləcəkdir.  Müsabiqənin məqsədi gənclər arasında sosial bloqçuluğu inkişaf etdirmək, onların yazı və yaradıcılıq qabiliyyətlərini artırmaqdır. Müsabiqə açıqdır və bütün blogerlər iştirak edə bilər.

Yazılar müəlliflərin öz bloqlarında və ya www.sosium.com saytında yerləşdirilə bilər. Müsabiqənin münsiflər heyəti yeni media və jurnalistika sahəsində tanınmış şəxslərdən ibarətdir. Yazıların qiymətləndirilməsi zamanı yazılara məhz bloqçuluq tərəfdən düzgün yanaşmağa, işıqlandırılmış məsələnin reallığına, faydalılığına, araşdırılmasına və s. kimi məqamlara diqqət yeririləcəkdir. Müsabiqədə qalib gələn 5 yazının müəllifləri kiçik məbləğdə pul mükafatları qazanacaqlar. Mükafatlar Soros fondu tərədindən təqdim olunur.

Müsabiqə 28 mayda keçirilmiş təqdimatdan etibarən başlayacaq və 20 iyuna qədər davam edəcək. Qaliblər 23 iyun tarixində “Azərbaycan Media Mərkəzində” keçiriləcək təqdimat mərasimində elan olunacaq.

“Yaz Yay Məktəbi” layihəsinin məqsədi gəncləri öz fəaliyyətlərində, ictimai həyatda, sosial məsələlərin işıqlandırılmasında İnternet, Yeni Media vasitələrindən daha geniş və effektiv istifadəsi istiqamətində maarifləndirməkdir. Bu məqsədlə layihə çərçivəsində Bloqlar, İnternetdə PR və İnternetdə fotonun istifadəsi haqqında təlimlər də daxil olmaqla 6 təlim keçirilməsi nəzərdə tutulub. 

Jalə Nəcəfova