KOSMOS

İlon Maskın “Space X” kosmik şirkəti NASA-nın “Artemida” Ay missiyasını gecikdirməsi ilə bağlı ittihamlardan sonra Agentliyə yeni “sadələşdirilmiş” eniş proqramı təqdim edib.

Xeberler.az “Reuters”ə istinadən məlumat verir ki, “SpaceX” özünün “Starship” Ay proqramında gecikmələrə görə NASA-nın artan təzyiqindən sonra ekipaj təhlükəsizliyinə və missiyanın sadəliyinə diqqət yetirərək Aya eniş kampaniyasını yenidən planlaşdırır. Şirkət gözlənilməz bir addım ataraq NASA-ya sadələşdirilmiş missiya arxitekturası təqdim etdiyini açıqlayıb. Bu təklifin Amerika astronavtlarının Ayın səthinə qayıtma müddətini azalda biləcəyi bildirilir.

Şirkətin bəyanatında qeyd olunub: “Biz rəsmi olaraq sadələşdirilmiş missiya arxitekturasını qiymətləndiririk və inanırıq ki, bu, eyni zamanda ekipajın təhlükəsizliyini yaxşılaşdıracaq, Aya daha sürətli qayıdışa səbəb olacaq”.

NASA-nın baş inzibatçısı Şon Daffinin “Artemida-3” missiyası üzrə 4 milyard dollarlıq tenderin başqa şirkətə verilə biləcəyi bəyanatı İlon Maskın və ictimaiyyətin kəskin reaksiyasına səbəb olub. Milyarder Daffini tənqid edib və onun NASA-nın proqramı ilə bağlı davranışını şübhə altına alıb.

Bu arada, “SpaceX” gələcək missiya sınaqlarına doğru bir addım olan “Starship” üçün ekipaj kabinəsinin dizaynı üzərində işə başladığını bildirib. Şirkət bəyan edib ki, “Starship” insanların Yerin təbii peykinə qayıtmasının ən sürətli yolu və “Artemida” proqramının Ay səthində daimi, davamlı bir varlıq yaratmaq məqsədinin əsas təminatçısı olaraq qalır”.