KOSMOS

NASA-nın Ayda baza qurulması proqramının rəhbəri Karlos Qarsia-Qalan bildirib ki, ABŞ-nin Aya pilotlu missiya göndərmək və orada baza tikməyə başlamaq üçün kifayət qədər məlumatı yoxdur.

Xeberler.az xarici mediaya istinadən məlumat verir ki, Qarsia-Qalan mətbuat konfransında bildirib: “Ayın səthi, o cümlədən onun cənub qütbü haqqında çox şey bilirik, amma bu, ora insanları göndərmək və baza tikmək üçün qətiyyən kifayət deyil”.

O, bu səbəbdən Ayın səthində müxtəlif avadanlıqların yerləşdirilməsinin, resursların araşdırılmasının və şəraitin öyrənilməsinin vacib olduğunu vurğulayıb.

Qarsia-Qalanın sözlərinə görə, Ayın tədqiqinin növbəti mərhələsində NASA gələcək enişlərin uğurla həyata keçirilməsini təmin etmək üçün Yer kürəsində müxtəlif yerləri sınaqdan keçirəcək. O, etibarlı məlumatların əldə edilməsini gələcək hazırlıqların məqsədlərindən biri kimi qeyd edib.

Proqram direktoru əlavə edib ki, Ay bazası tikməzdən əvvəl NASA daimi infrastrukturun yaradılmasına və Yerin təbii peykində uzunmüddətli mövcudluğu təmin etməyə imkan verən texnologiyaları sınaqdan keçirməlidir.

NASA-nın inzibatçısı Cared İsaakman isə bildirib ki, agentlik Ayın təhlükəli ərazilərinə enişlərə hazırlıq məqsədilə çoxsaylı kiçik pilotsuz missiya planlaşdırır. O, bunu inanılmaz dərəcədə çətin vəzifə adlandırıb: “Cənub qütbünə eniş etmək və daimi kölgənin olduğu ərazilərdə işləmək çox çətindir”.

Əvvəlcə Artemis III missiyasının bir hissəsi olaraq 2027-ci ildə planlaşdırılan Aya eniş 2028-ci ilə (Artemis IV) təxirə salınıb. Bundan əvvəl 2027-ci ildə Aya müntəzəm pilotsuz uçuşlar planlaşdırılırdı. NASA 2029-cu ilə qədər Ayın səthinə etibarlı enişi və orada təcrübələr aparmağı təmin etməyə ümid edir. Daha sonra Ay bazasının ilkin əməliyyat imkanlarını yaratmaq və 2032-ci ilə qədər orada heyətlə işləməyə başlamaq planlaşdırır.