SÜNİ İNTELLEKT VƏ DATA

Azərbaycan Memarlıq və İnşaat Universitetinin (AzMİU) 50 illik yubileyi çərçivəsində 16–19 may tarixlərində AzMİU ilə Daşkənd Memarlıq və İnşaat Universitetinin Əcnəbi dillər kafedralarının birgə təşkilatçılığı nəticəsində “Yeni davamlı dünyada süni intellektin rolu: Memarlıq, təhsil, mədəniyyət və media” mövzusunda beynəlxalq elmi konfrans keçirilib.

Xeberler.az məlumat verir ki, onlayn formatda keçirilən konfransın əsas məqsədi süni intellektin sürətlə inkişaf edən texnologiyaları fonunda müxtəlif sahələrə – xüsusilə memarlıq, təhsil, mədəniyyət və mediaya təsirini araşdırmaqla bu istiqamətdə müasir yanaşmaları müzakirə etmək olub.

Yerli və xarici ali təhsil müəssisələrinin nümayəndələrini, tədqiqatçıları, mütəxəssisləri və tələbələri bir araya toplayan konfrans elmi-təcrübi fikirlərin bölüşülməsi, innovativ ideyaların təqdim olunması və gələcək birgə layihələrə zəmin yaradılması baxımından məhsuldar və dinamik müzakirələrlə yadda qalıb.

Konfransın açılış mərasimində AzMİU-nun Əcnəbi dillər kafedrasının müdiri dosent Aygün Məmmədova çıxış edərək süni intellektin çağdaş dünyada oynadığı roldan və bu sahədə aparılan elmi araşdırmaların əhəmiyyətindən bəhs edib.

Konfransda AzMİU-nun  elm və innovasiya məsələləri üzrə prorektoru professor Nigar Aslanova, Bakı Slavyan Universitetinin beynəlxalq əlaqələr üzrə prorektoru dosent Aytən Bayramova, İtaliyanın Politecnico di Torino Universitetinin professoru Fabrizio Barpi, Daşkənd Memarlıq və İnşaat Universitetinin Beynəlxalq ‘laqələr şöbəsinin müdiri T.A. Nigmatjonovna, həmin universitetin Xarici dillər kafedrasının müdiri Hilola Zakirova, Atatürk Universitetinin İngilis dili və ədəbiyyatı kafedrasının müəllimi dosent Mehmet Başak və AzMİU-nun Strateji planlaşdırma şöbəsinin müdiri Qənirə Məmmədzadə də çıxış ediblər.

Çıxışlarda süni intellektin müasir cəmiyyətə təsiri, eləcə də bu sahədə beynəlxalq əməkdaşlığın vacibliyi vurğulanıb.

Qeyd etmək lazımdır ki, bu konfrans AzMİU-nun qlobal miqyasda tanınmasına, xarici əlaqələrin genişlənməsinə və elmi əməkdaşlığın dərinləşməsinə mühüm töhfə verir.