TEXNOLOGİYA

Azərbaycan Memarlıq və İnşaat Universiteti (AzMİU) Tələbə Elmi Cəmiyyətinin üzvlərindən ibarət “Phonix” və “Primetech” komandaları Dünya Robototexnika Çempionatının (WRC) final mərhələsinə vəsiqə qazanıblar.

Xeberler.az məlumat verir ki, komandalar uğurla keçdikləri seçim mərhələləri nəticəsində ikiaylıq tam təqaüdlü təlim proqramına da qəbul olunublar. Bu uğur AzMİU tələbələrinin elmi-texniki sahələrdə yüksək bilik və bacarığa, yenilikçi düşüncə tərzinə və beynəlxalq səviyyədə rəqabət apara biləcək potensiala sahib olduqlarını bir daha nümayiş etdirib.

Azərbaycanı layiqincə təmsil etməyi, beynəlxalq arenada AzMİU-nun adını yüksəklərə qaldırmağı qarşılarına məqsəd qoyan təmsilçilər final mərhələsində “RoboSoccer” kateqoriyası üzrə mübarizə aparacaqlar.

Qeyd edək ki, WRC – robototexnika, süni intellekt, mühəndislik və digər texnoloji sahələrdə innovativ gəncləri bir araya gətirən nüfuzlu beynəlxalq müsabiqədir. 16-30 yaş arası iştirakçıların qatıldığı yarışda gənclər komandalar şəklində öz yaradıcılıqlarını və texniki biliklərini nümayiş etdirmək imkanı qazanırlar.

Azərbaycan üzrə final mərhələsinin 2025-ci il iyunun 7-8-də Xankəndi və Bakıda keçirilməsi planlaşdırılır. Bu mərhələdə qalib gələn komandalar avqustun 21-24-də Hindistanda təşkil olunacaq beynəlxalq finalda ölkəmizi təmsil edəcəklər.