EDUTECH

Azərbaycan Memarlıq və İnşaat Universiteti (AzMİU) ilə İqtisadiyyat Nazirliyinin tabeliyində fəaliyyət göstərən Dördüncü Sənaye İnqilabının Təhlili və Koordinasiya Mərkəzi (4SİM) arasında əməkdaşlıq imkanlarının genişləndirilməsi məqsədilə görüş keçirilib.

Xeberler.az Azərtaca istinadən məlumat verir ki, görüşdə AzMİU-nun rektoru Gülçöhrə Məmmədova ali məktəbdə həyata keçirilən tədris, elmi-tədqiqat və innovasiya fəaliyyəti, eləcə də universitetdə aparılan rəqəmsallaşma təşəbbüsləri barədə ətraflı məlumat verib.

Gülçöhrə Məmmədova diqqətə çatdırıb ki, cari ildən etibarən universitetdə süni intellekt sahəsində yeni təşəbbüslərin icrasına başlanılıb. Rektor bu istiqamətdə 4SİM ilə fəaliyyətin genişləndirilməsinin əhəmiyyətini vurğulayıb.

4SİM-in icraçı direktoru Fariz Cəfərov rəhbərlik etdiyi qurumun fəaliyyət istiqamətləri, əsas prioritetləri, eləcə də rəqabətli insan kapitalının inkişafına yönəlmiş layihə və təşəbbüslər haqqında məlumat verib. O, xüsusilə “4Sİ Akademiyası-Milli Proqram” çərçivəsində AzMİU əməkdaşları və tələbələrinin iştirakını qeyd edib.

Görüşdə tərəflər arasında əməkdaşlığa dair Anlaşma Memorandumu imzalanıb. Sənəd tərəflər arasında təhsil, elm, innovasiya və sənaye əlaqələrinin gücləndirilməsinə, eləcə də müasir texnoloji çağırışlara uyğun rəqabətli insan kapitalının formalaşdırılmasına xidmət edir. Memorandum çərçivəsində Sənaye 4.0 və süni intellekt sahələrində birgə təşəbbüslərin həyata keçirilməsi, elmi-tədqiqat və təcrübə mübadiləsinin genişləndirilməsi əsas prioritetlər kimi müəyyən olunub.